Дүйсенбіде Қазақстан қор биржасындағы сауда-саттық Франкфурт аукционы әдісі бойынша кешіктіріліп өтті. Бұл шешім биржалық алыпсатарлықты азайтатыны хабарланды

KASE сауда-саттығының қорытындысы бойынша доллардың орташа бағамы 495 теңгеге жетті.

Қазақстан қор биржасының басқарма төрағасының орынбасары Наталья Хорошевская сауда-саттықта ешқандай дүрлікпе байқалмағанын атап өтті.

Бүгін Ұлттық банк қор биржасымен бірлесіп, сағат 15:00-ге дейін биржалық валюталық сауда-саттықты тоқтатқан болатын. Түстен кейін сауда-саттық Франкфурт аукционы форматында өтті. 1 наурызда қандай форматта өтетіні әлі белгісіз.

Қазір "теңге – АҚШ доллары" бойынша сауда-саттық аяқталды. Қалған шетел валюталары бойынша сағат 17:00-ге дейін жалғасады.

2022 жылдың 25 ақпанымен салыстырғанда доллар 30 теңгеге жуық қымбаттады. Ол кезде орташа бағам 466,66 теңге шамасында болатын.