Цой ПТР-тестің бағасы қанша теңге дейін төмендейтінін айтты
Денсаулық сақтау министрі Алексей Цой Қазақстанда ПТР-тестілеу бағасы қанша теңгеге дейін төмендейтінін айтты, деп хабарлайды Stan.kz ақпарат агенттігі.
"Қазір болжам бойынша қарап отырмыз. Шамамен 11 мың теңгеден 8900 теңгеге дейін төмендеуі тиіс. Бұл есептеулер қазір жүргізіліп жатыр, оларды тікелей салалық қауымдастықтармен, "Атамекенмен" пысықтап жатырмыз", - деді министр ОКҚ онлайн-брифингінде.
Бұған дейін президент Қасым-Жомарт Тоқаев коронавирусты анықтайтын тест құнын төмендетуді тапсырған еді.
"Зертханалар желісінің кеңеюіне және бүкіл әлемде тестілеу құнының төмендеуіне қарамастан, бізде бағалар жоғары болып отыр - 10-нан 18 мың теңгеге дейін. Бұл халықтың едәуір бөлігі үшін қолайсыз сома деп ойлаймын", - деді президент 7 қазанда коронавирустық пандемияның екінші толқынына дайындық жөніндегі кеңесте.
