Газетіміздің өткен санында көңілді бір серпілткен жақсы хабарды жариялап, індеттің әсерінен болған келеңсіздіктерге шолу жасаған едік. Онда біз «қызыл» аймақтан «сары» аймаққа өткен облысымыздың карантиндік талаптарды сақтауда өте қатаң әрі жүйелі жұмыс істегенін байқауға болатынын, Сыр халқының да бұл көрсеткіште үлесі барын және қауіптің шеңберінен ортақ тәртіпке бағыну арқылы шыға білген аймақ жұртшылығының ұжымдық иммунитет қалыптастыруда да белсенділік танытқанын тілге тиек еттік. Енді міне, көптің тілеуімен қауіпсіз аймақтардың сапынан табылдық.

Өткен аптадағы жағдай бойынша Қа­зақ­стан өңірлеріндегі эпидемио­ло­гия­лық ахуалды бағалау матрицасы жария­ла­нысымен «сары» аймақтағы Сыр елі­нің «жасыл» аймақтар қатарынан сап түзе­генін көрдік. Ал тиісінше «қызыл» ай­мақта Нұр-Сұлтан, Алматы қалалары, Атырау, Алматы, Ақтөбе, Ақмола, Шығыс Қазақстан, Батыс Қазақстан, Қара­ған­ды, Қостанай, Павлодар, Солтүстік Қа­зақ­стан облыстары, «сары» аймақта Шымкент қаласы, Жамбыл, Маңғыстау облыс­тары болса, «жасыл» аймақта Қызылорда мен Түркістан об­лысы тұр. “Жақсылықты айт­саң, көбейеді” демекші, көптен бері қауіпті өңірлердің қатарынан орын алып келген аймағымыз «жасыл» аймаққа қайта енді, енді олардың қатары әлі де толықсын дейміз.

Ресми ақпарат көздері індет жұқтыр­ғандар санының азайып, Сыр еліндегі ахуалдың қайта тұрақтана бастағанын мәлімдеді. Бұл дегеніңіз, осы қалыптан таймасақ, Қызылордадағы індеттің тара­луы бә­сең­деп, тіпті толастауы да мүмкін деген сөз. Бірақ «қамысты бос ұстасаң, қолыңды ке­сетінін» естен шығармайық. Бұған дейін де облыс көлемінде вирус жұқтырғандар санының артқаны анық­талса, енді есеп­тік көрсеткіш бойынша аймақтағы коронавирус жұқтырғандардың саны төмен­деген. Өткен тәуліктің өзін­де жүзден аса науқас індеттен айы­ғып, отбасына аман-есен оралған. Ал аудан­дағы стационарда 9 науқас ем қабылдап жатыр, оның біреуі – бала. Тіркелген нау­қас­тар санының азаюының да се­бебі бар. Әсіресе ақ халаттылардың жан­айқайына құлақ түріп, вирусқа қарсы вак­цина қабыл­даған адамдардың үлесін айта кету керек.

Бірақ дәрігерлер қауымы әлі күнге дейін індетке қарсы бірден-бір күш ол вакцина екенін айтуда. Осы тұста «Лезде қалай «жасыл» аймаққа ендік?» деген сұраққа да жауап іздеп көру керек секілді. Бұған дейін қаншама жан дертпен арпалысып, ауыр күндерді бастан кешті. Кейбірі өмірімен қоштасты. Көптеген шаңырақ індеттің тара­луынан жақынынан айырылып, қара жамылды. Осындай қайғылы жағ­­дайды болдырмау үшін ел ішінде ревак­ци­на­ция­лау жұмыстары басталды. Мерзімі келіп тұрған тұрғындар қайтадан екпе қа­былдап, иммунитетін қалыпқа келтіріп алуы керек. Бүгінгі таңда ауданда екпе қабылдау жұмыстары қарқынды жүргі­зілуде. Осыған дейін өңір бойынша үш мыңға жуық адам ревакцина қабылдаған. Тұрғындарды ревакцинациялау әлі де жалғасын табады.

Медицина мамандары қанша жер­ден қауіпсіз аймаққа өткенімізбен, сақ­та­­нудың артықтық етпейтінін айтады. Өйткені қауіп әлі сейілген жоқ. Әлі де дертті жұқтырғандар бар арамызда. Жа­зылып шықпаған науқастар да ті­зімде тұр. Тексеріліп жатқан, індет жұқ­тырғандармен қарым-қатынаста болған­дарды да еске саламыз. Мәселен, вирус жұқтырғандардың көбісіне басты себеп карантиндік тәртіпті сақтамай, қауіпсіздік шараларын қабылдамағанынан болуы мүмкін. Өйт­кені бұл дерттен аман болудың ең басты жолы вакцина болса, тиісінше денсаулыққа мән беру, медициналық бетперде кию мен қолдың тазалығы және көпшіліктен оқшауланудың да пайдасы мол. Өткен тәуліктің өзінде Қазақстан бойынша төрт мыңға жуық індет жұқтырған науқас тіркелсе, біздің облыстағы көр­сеткіш жиыр­мадан жуық адамды құрап отыр. Демек, «қауіпсіз аймақтамыз» деп, тым еркінсуге әлі ерте. Дүниежүзінде дөңгелеп жүріп дүрбелең туғызған тәж­тажалдың құрығы қысқарғанымен, өзі жойылмағанын ескерейік.