Өзіңді өлімге қию қиындықтан құтқармайды

Тұрмыс тапшылығы пенде баласын қажытады, титықтатады. Тауқымет тартқандардың көбі күреседі, жеңеді. Ал көп адамда ондай күрескерлік қайрат болмайды. Жүйкесі сымдай тартылып, төзімі таусылғанда морт сынады. Өз-өзін тастап жібереді. Көбі ішімдіктен жұбаныш табады, ал кейбірі өз-өзіне қол салып, өмірімен қош айтысып кете барады. Бірақ олар тұрмыстың азабын өзімен бірге арқалап кетпейді, артындағы жақын-жуығына, балаларына тастап кетеді. Әке-шешенің көрген тауқыметі балаларына көшеді. Ештеңе жеңілдемейді. Біздің қоғамда тағдырындағы қиындықтармен күресте сол "оңай" жолды таңдайтындар көбейіп барады.

Түсінеміз, адам темірден емес, ет пен сүйектен жаралған. Кейде тір­ші­ліктен түңіледі, жолында үнемі көлде­нең­деп жатып алған кедергілер мен қиын­шылықтардан титықтайды. Бірақ Жа­ратушы адамға өмірді өлшеп бер­ге­німен, оның бойындағы ерік-жігер, тө­зімге келгенде тарлық жасаған жоқ. Ке­рі­сінше қуатың, шыдамың сарқылса, есе­леп тұрады. Тек жүрегіңде жарқын бола­шақ­қа деген сенім оты сөнбесе болғаны. Алдағы күнінен жақсылық күткен және соған ұмтылған адам – иманды адам. Ал иманды адам өзінің де, өзгенің де өмі­ріне қиянат қылмайды.

Былтыр үш баласын бірдей тоғы­зын­шы қабаттың терезесінен лақтырып жіберіп, артынан өзі де секіріп мерт бол­ған келіншек әлеуметтік желіде қызу талқыланды. Алматы қаласында бол­ған осы қайғылы оқиға елімізді ғана емес, жарты әлемді дүр сілкіндірді. Бір емес, үш перзентін бірдей өлімге қиған қатыгез әйелді тілдегендер де, дәлел, дәйек келтіріп, қорғағандар да болды. Мұсылмандық, тіпті өзіміздің қа­зақы түсінікке салсақ, өлген адамның соңы­нан жаман сөз айтылмайды. Десе де тағдыр тауқыметін қанша тарт­са да, әлі есі кірмеген бауыр еті үш бала­сына аяусыздық танытқан әйелдің әре­кеті ақтауға келмесі анық. Аналық па­рыз­ды айтпағанда, кез келген әйелдің жүрегіндегі аналық сезім, аналық махаб­бат деген құдіретті күш қандай қиындық кездессе де балаларын аман сақтап қалу үшін ақырғы деміне дейін жанталаса кү­ресуге жетелемеуші ме еді?! Ал өмір­дің тоқпағын көрдім деп және сол теперішті ме­нен кейін балаларым да көрмесін деп, өзімен бірге үш перзентін бірдей азап­ты өлімге байлаған қандай құрбандық?..

Жақында Ішкі істер министрлігінің ғи­мараты жанында бір әйел өзіне от қойып жіберді. Абырой болғанда, ай­на­ласындағылар құтқарып қалды. Денесін күйік шалған әйел ауыр жағдайда жан­сақтау бөліміне түсті. Бұл әйелдің өзіне қол жұмсаудағы мақсаты мүлде бөлек. Әлеуметтік желіне шарлап кеткен бұл оқиғаға қатысты жұрт сан алуан пікір білдірді.

Қазір халықты алдап, оңай жолмен ақша табатын алаяқтар көп. Әсіресе он­дайлар әлеуметтік желілерде өте бел­­сенді. Тәулік бойы қызылды-жа­сыл­ды көпірме жарнамаларымен желі қол­данушыларын арбап отырып, бір күнде жүздеген адамды тұзағына түсіреді. Өзін өртеген әйел де сондай алаяқтардың құрбаны болған. Қаржы пирамидасына салған ақшасын кері қайтарып ала ал­май, заң орындарынан да әділет таба алмай әбден ашынған әйел сондай әре­кетке барған. Тиісті орындар зардап шекк­ен әйелге қатысты "өз-өзіне қол са­луға дейін жеткізу" бабы бойынша қыл­мыстық іс қозғалғанын хабарлады. Бұл жерде алаяқтарға алданған әйел және оның туған-туыстары істі жабуға ты­рысты деп полицияны кінәлайды. Дұрыс шығар, 20 миллион теңге ақшасын өз қолымен алаяқтардың қалтасына са­лып беріп, сан соғып қалу кімге болса да оңай тимейтінін түсінеміз.

Алайда қазір ақпарат көп. Сенімді сақ­тандыру ком­па­ниялары және көп. Соған қара­мастан елімізде он мыңдаған адам қаржы пира­мидаларына алданып, зар еңіреп жүр. Соны көріп-біліп отырып, әпенделік әре­кет жасайтындарға таң­ғаласың. Әлде олар­дың әрекеті сау­са­ғының ұшын қи­мыл­датпай-ақ оңай әдіс­пен, ашығын айт­­сақ, арам жолмен бір тиын­нан екі тиын пайда көрсем деген тойымсыздық па?

Жарайды, адам қателеседі, қиыс ба­сады. Бірақ қандай жағдай болса да мұсылман үшін аманат жанға қиянат жоқ. Алдыңғы буын басынан өткен қиын­шы­лыққа төзбей өзін өртеп, құздан лақ­тыра берсе, артымыздан өсіп келе жат­қан жас ұрпаққа мағыналы, мәнді өмір сү­рудің қағидаларын үйретіп, сабыр, тө­зім жайында айтып қажеті де жоқ шығар.

Дүниеқоңыздық құмарлығы адам­дық қамалын қиратып, бар мүл­кі­нен, қаражатынан айырылып, заң орын­да­ры­нан, құқық қорғаушылардан шарқ ұрып араша сұрап, ақыр соңында сол қа­телігінен туындаған қиындыққа өмірін құрбан етіп кете баратын бейбақтар жайында жиырма бірінші ғасырда не деп айтуға болады?

Дінімізде Алланың аманат жанына қиянат қылу үлкен күнә саналады. Ол адам тозаққа барады. Тіпті бұрындары ата-бабаларымыз өз-өзіне қол сал­ған­дарды көпшілік қорымға қоймай, бөлек жерлейтін болыпты. Ең ауыры, ондай өліммен өмірден өткендерге жаназа шық­паған. Адамды сондай жағдайға апа­ратын дүниәуи дерт – тойымсыздық, қанағатсыздық. Ендеше, көзі ашық, кө­кірегі ояу, қаржылық сауаттылықты мең­­герген, одан бөлек күн сайын ме­шітке барып құмарлықты жеңіп, нәпсіні тыю­дың жолдары, адал мен арам нәрсенің айыр­масы жайында уағыз тыңдап жүрген қаракөздеріміз бір сәт ойлануы керек шығар...