Алғашқы ресми сапар: Тоқаев Путинмен кездесу үшін Ресейге барды
Қазақстан президенті Қасым-Жомарт Тоқаев алғашқы ресми сапарға аттанып, Ресейге барды.
Бұл туралы «РИА Новости» басылымына сілтеме жасап Stan.kz хабарлайды.
Тоқаевтың Ресейге баруы мемлекет басшысы ретіндегі алғашқы сапары болды.
Президенттің борты Мәскеудегі Внуково-2 әуежайына Нұр-Сұлтан уақыты бойынша сағат 14:00-де қонды. Мемлекет басшысын Ресейдің сыртқы істер министрлігінің департамент басшысы Игорь Богдашев пен Ресейдегі Қазақстан елшісі Иманғали Тасмағамбетов күтіп алды.
Тоқаевты қарсы алған құрмет қарауылы екі елді әнұрандарын орындады.
Айта кетсек, мемлекет басшысы сапарының бағдарламасындағы басты мәселе Ресей Федерациясының президенті Владимир Путинмен өткізілетін келіссөздер болып табылады. Қазақстан мен Ресей басшылары кездесуінің күн тәртібі саяси, сауда-экономикалық, мәдени-гуманитарлық саладағы, сондай-ақ өңірлік және халықаралық тақырыптағы өзекті мәселелерді қамтиды. Сапар қорытындысы бойынша бірқатар екіжақты құжатқа қол қойылады деп жоспарланып отыр.
