УЕФА барлық Еуропа кубогы турнирлеріндегі  сырт алаңдағы гол артықшылығы ережесін алып тастады. Бұл туралы УЕФА-ның ресми сайтында жарияланды.

Өзгеріс 2021/22 УЕФА клубтық жарыстарының іріктеу кезеңінен бастап күшіне енеді. Шешім ерлер, әйелдер және жастар деңгейіндегі клубтық турнирлерге қатысты.

Еуропа клубтар арасындағы жарыс үшін cырт алаңда гол соғу ережесі 1965 жылдан бастап күшіне енді. Сырт алаңда ең көп гол соққан команда артықшылықты гол саны теңескен кезде алды. Осы ереже жойылғаннан соң екі матчтан кейін гол айырмашылығы бірдей болған командалар  15 минуттан екі тайм ойнайды. Қосымша уақытта тең түскен жағдайда жеңімпаз пенальти сериясында шешіледі.

Сырт алаңдағы голдың критерийі командалардың бірін-бірі салыстыру кезінде турнирдің топтық кезеңінде бірдей ұпай жинаған кезде де есепке алынбайды. Бірақ бұл критерий (сырт алаңдағы гол саны) топтық кезеңдегі барлық матчтардың қорытындысы бойынша командалардың көрсеткіштері тең болған жағдайда қосымша өлшемдер қатарында қалады.