ОТЫЗ ЖЫЛДЫҚТА ОТЫЗЫНШЫ КӨЛІГІН ТАБЫСТАДЫ

Сәрсенбінің сәтінде ауданға қарасты Еңбек ауылында сабан той өтті. Күзгі мерекені ұйымдастыруға мұрындық болған осындағы «Еңбек жер» ЖШС-ның директоры Шакизатхан Әбдіғаппарұлы бірнеше азаматқа лайықты құрмет көрсетті.
Тарқатып айтсақ, биылғы жылдың егін жинау маусымын қорытындылаған «Еңбек жер» ЖШС директоры механизатор Дастан  Мұратбаевқа тұрғын үй салып беруге 7 млн теңгенің сертификатын табыстаса, сушы Кенжебек Орынбаевқа 5 млн теңгеге тұрғын үй кілтін сыйлады. Мұнан соң үш озат жұмысшы 15 млн теңгеге су жаңа үш теміртұлпарды тізгіндеді.
Сонымен қатар «Еңбек жердің» 18 жұмысшысы қаржылай сыйлықтарға ие болып, еңбектері елеусіз қалмады. Қаржылай сыйлықпен мараптталған азаматтардың қатарында  озат сушы Өмірбек Жаңабаев 1,5 млн теңгеге, 2 бас маман 600 мың теңгеге, 1 маман 300 мың теңгеге 2 озат механизатор 600 мың теңгеден 1,2 млн теңгеге, 3 сушы 500 мың теңгеден 1,5 млн теңгеге, 9 механизатор 300 мың теңгеден 2,7 млн теңгеге ие болды.
Бұдан бөлек ауыл жанашыры, айтулы азамат Шакизатхан Әбдіғаппарұлы М.Байділдаев атындағы №232 орта мектеп жанынан құрылған музыкалық орталыққа музыкалық аппарат алуға 1 млн теңге қаржылай сыйлық бөлді. Сабан той барысындағы барлық игі іске ауыл тұрғындары куә болып, абыз ақсақалдар ақ батасын беріп жатты. Аталған серіктестік қызметкерлеріне тағайындалған сыйлықтрадың жалпы құны 40 млн теңгені құрады. Ал еңббектің озық үлгісін көрсеткен азаматтарға темір тұлпар мінгізген Шакизатхан ағамыздың биылғы тәуелсіздіктің 30 жылдығындағы отызыншы көлігі болды.
Жалпы қазақ «Ауылына қарап азаматын таны» дейді. Осы бір ғана қанатты сөздің астарында үлкен мән барын Шакизатхан Ысқақов жақсы біледі. Туған жерге деген перзенттік парызын өтеу жолында жүзеге асырған жобаларын тізе берсек жетіп артылады. Бастысы азаматтың адамгершілік болмысы мен іскерлігі, жақсының жанынан табылатын мәрттігі көпке үлгі болмақ. Еңбектегі берекелі істердің соңы бұл емес, алда әлі де талай игі істерді қолға алатынына сенеміз.