Қазақстандық және ресейлік сарапшылар Сыр елінде "Ақылды қала" тұжырымдамасын талқылады. «SMART CITY: аймақтың дамуындағы жаңа мүмкіндіктер» атты дөңгелек үстелде Мәскеу, Краснодар, Астана қалаларында іске қосылған «Ақылды қала» тұжырымдамасы бойынша цифрландыру және «SMART CITY Қызылорда» тұжырымдамасын жүзеге асыру мәселелері сөз болды.

Басқосуда «Цифрлық Қазақстан» мем­лекеттік бағдарламасы және «Ақылды қала» тұжы­рымдамасы аясындағы жобалар­дың ай­­­­­мақ­та жүзеге асу барысы айтылды. Мәсе­лен, аталған бағдарлама мен «Smart city» тұ­­­­­­­жырымдамасы бойынша, биыл өңірде 37 жо­­­­ба жүзеге асуда. Сондай-ақ, біздің облыс «Ақыл­ды басқару» бағытында пилоттық аймақ ре­тінде таңдалды. Өңірде қолға алынған жобалар 8 бағыт бойынша, оның ішінде 5 негізгі жоба «Smart City» аясында: білім беру, денсаулық сақтау, тұрғын үй, көлік және қауіпсіздік салалары негізінде жүзеге асатыны айтылды.

Цифрландыру бағытындағы жұмыстар мұнымен шектелмек емес. Мәселен, бүгінде өнеркәсіп саласын цифрландыру бойынша «Интеллектуалды кен орны» цифрлық тех­­­нологиясын енгізу жұмыстары басталып кетті. Алдағы уақытта мұнай өндіруді 1-2 пай­ызға, күрделі жөндеу мерзімін 700 күнге дейін арттыру, операциялық шығындарды 10 пайызға дейін төмендету және басқару ше­­­­­шім­­­­дерінің тиімділігін 20 пайызға арттыру жоспарда бар. Мұнан бөлек, уран өндіру өнер­­­­кәсібінде: «Байкен-U» ЖШС кәсіпорны «Қазатомөнеркәсіп-Сайран» ЖШС-ның тазарту цехында дайын бұйымдарды жинау блогының роботтық кешенін енгізу тәжірибесі бойынша зерттеулер жүргізуде. Роботтық кешенді енгізу қолмен жұмыс істеуден босатып, өнімді тасымалдау, орауға қатысты барлық алгоритмді автоматтандыруға және экологиялық жағ­дай­ды жақсартуға мүмкіндік береді. Ал, білім беру саласында аймақтағы білім беру мекемелерін мемлекеттік-жекеменшік әріп­тестік арқылы ком­­­­пьютермен қамту шаралары қабылданды. Жыл аяғына дейін 293 мектеп жоғары жылдамдықты интернет және Wi-Fi желісімен жаб­дықталады. Сондай-ақ, аймақтағы 293 бі­лім беру мекемесі «Күнделік» электронды журнал жүйесіне қосылған.

Денсаулық сақтау саласы бойынша өңір­дегі 80 пайыз медициналық мекемелерде кеңжолақты интернет желісі орнатылған. Медицина мекемелерін «қағазсыз айналымға» көшіру жұмыстары қолға алынды. Тұрғындарға көрсетілетін медициналық қызметті жақсарту мақсатында «Облыстық медициналық орта­лықта интеграцияланған операциялық жүйені орнату» жобасы жүзеге асырылуда. Бұл жоба отаға дайындық уақытын 20 пайызға дейін қысқартып, өлім қаупін азайтады, сондай-ақ, жылына 3 мыңға дейін операция өткізуге мүмкіндік береді. Цифрландыру бағытындағы ілкімді істер қауіпсіздік секторында, ауыл ша­руашылығы және кәсіпкерлік салалары бойынша да қолға алынуда.

Басқосуда мамандар цифрландыру жобаларын әзірлеу және енгізу тәжірибесімен бөлісті. Сондай-ақ, цифрлық технологиялар кө­мегімен Краснодар бюджетін жылына жарты миллиард рубльге дейін қалай ұлғайтылғаны сөз болды. Қазіргі таңда аймақта смарт-менеджмент, білім, денсаулық сақтау, тұрғын үй, көлік, қауіпсіздік және бизнес саласында 30-дан астам жоба жүзеге асуда. Біздің облыс «Ақылды басқару» бағытында пилоттық аймақ ретінде таңдалды. Оның шеңберінде жаңа кіші жүйелерге арналған «Ситуациялық орталықтың ақпараттық-талдау жүйесін дамыту» жобасы іске асуда. Сонымен қатар, дарынды жастарды қолдау үшін техникалық лабораториялар мен коворкинг орталығының қызметтерін көрсету, ІТ-стартап-жобаларын және бизнес-инкубаторды дамыту мақсатында Қызылорда қаласында «ІТ паркі» құрылды. Ал, өткен жыл­дың аяғында облыста «HackDay-2017» жас IT-мамандарының алғашқы аймақтық фестивалі өткен болатын.