Мекке қаласындағы қасиетті тас – Қағба әлемдегі мұсылмандардың ең көп жиналатын ғибадат орыны. Онда жыл сайын әлем елдерінен бірнеше миллион адам қажылық парызын өтеуге барады. Бүгінде Алла назарын салған сол Мекке қаласы көркейіп, көріктене түскен. Бес уақыт сәждеге бас қойып, Жаратушыға сәт сайын құлшылық жасап тұратын мұсылмандар үшін тәулік мезгіліндегі дәлме-дәл уақыттың маңызы зор. Қажылық сапарға аттанғандар Алланың кереметтері мен қағбаның қасиеттерінен бөлек, Меккедегі Мукаррамма сағатына да таңдай қағып қайтады. Теңіз деңгейінен 400 метр биіктікте орналасқан биіктігі 601 метр болатын алып сағаттың "жүрегі" бір сәтке тоқтамайды. Оның сағаттық тілі – 18 метр болса, минуттық тілі – 22 метр. Тілінің салмағы – 36 тонна тартады. Биік мұнараның төрт жағына да орналасқан сағат күндіз де, түнде 30 шақырым қашықтықтан көрінеді және тағы бір ғажабы, дүние жүзіндегі ең алып сағат түрлі-түсті шынылармен, асыл тастармен әшекейленген екен.

Адамзат тарихындағы ең алғашқы құры­лыс – Мекке қаласындағы қасиетті Қағба. Осы уақытқа дейін табиғи және техникалық апат­тарға байланысты бірнеше мәрте жөн­деуден өткен. Соңғы құрылыс 1996 жылы өт­кізіліп, тастары, шатыры ауыстырылып, ірге­тасы бекітілген. Алғашында Қағбада екі есік, тере­зесі болыпты. Қазір терезесі жоқ, бір ғана есігі бар.

Меккеге қажылыққа барып, қасиетті тасқа тәу ету барша мұсылманның тіршілігінде өтейтін парызы. Ал Қағба ішіне кіру мұсылман үшін арман ғана. Алайда, бұрын қалаған мұсыл­манға аптасына екі мәрте Қағбаға кіріп намаз оқуына рұқсат етіліпті. Қазір жылына екі рет жоғары лауазымды тұлғалар мен ерек­ше қонақтар үшін ғана ашылады екен.

Ғарыштан түсірілген суреттерден Мекке қаласы орналасқан аймақтың үнемі жарқырап тұратынын көруге болады. Ғалымдар Қағба орналасқан жерде Жер ғаламшарының маг­ниттік орталығы бар екенін анықтаған. Жердің магниттік полюстері өзгергенде Қағ­баның полюсі қалпында қалады екен. Бір кез­дері сахабалардың Қағбаны "Жердің кіндігі" деп атауында да бізге беймәлім сыр бар шығар.

Меккедегі әл-Харам мешітінде бір мезетте 2 миллионнан астам адам намаз оқи алады екен. Бір қызығы, жалаңаш таулар мен құм­дардың ортасында орналасқан Меккеде әлемнің барлық аймағында өсірілетін жеміс-жидектер мен көкөністер сатылады екен. Сондай-ақ, өзен-көлі жоқ шөлді өлкеден әлем­нің барлық мұсылмандары шөл қанды­рады екен. Өйткені онда қасиетті зәмзәм суы бар.

* * *

Қасиетті қала – Меккеде ұрлық жасал­майды, адамдар бір-біріне қиянат қылмайды. Тіпті аң-құс та ауланбайды, тал бұтағы сын­дырылмайды. Оған қатаң тыйым салынған. Демек, ол жер Алланың назарында тұр.

Бірде қажылық сапарға барған елімізге та­нымал тұлғаның Қағбаны айналып тәу етіп жүр­генде бағалы фотоаппаратын жоғалтып ал­ға­нын және оны ертесіне миллиондаған адам жүрген жерден қайта тауып алғанын оқы­ған едім. Жоғарыда айтылғандарға осы әңгіме куә.

Мекке қаласында адамзат баласына мағұлұм сарқылмайтын қайнар бұлақ бар. Ол – зәмзәм суы шығатын қасиетті құдық. Тереңдегі – 42 метр.

Ибраhим пайғамбардың жұбайы Сара ұзақ уақыт бала көтермеген соң Хажар есімді мысырлық әдемі бір күңді күйеуіне некелеп қосады. Хажардан Исмаил пайғамбар дүниеге келеді. Алайда, Сара күндесінің мұндай бақытын қызғана бастайды. Сондықтан Ибраһим пайғамбар Хажар мен Исмаилды Меккеге әкеледі. Ашығып қалмасын деп азын-аулақ құрма мен су қалдырады. Ибраhим пайғамбар кеткеннен кейін су таусылып, шөлдеген сәби шырылдап жылай бастайды. Хажар су іздеп Сафа мен Мәруә төбелері арасында жан ұшырып жүгіре береді. Сол уақытта Жәбірейіл періште аяғының (немесе қанатының) ұшымен Мәруә төбесінен жерді қазып, су шығарады. Кейін жүрhүм жұрты бұл қасиетті құдықты бітеп тастайды. Мұхаммед пайғамбардың атасы Абд ал-Мутталиб түс көріп, Зәмзәм құдығының орнын тауып алады. Аббас әулетінен шыққан халиф Әбу Жафар Мансұр Зәмзәм құдығының айналасына мәрмәр тасын орнатқан. Осман әулетінен шыққан сұлтан Сүлеймен Кануни Зәмзәм құдығы айналасын 1,5 метр биік мәрмәрмен қоршап, хауыз салдырды. Міне, бүгінде Меккеге келген барша мұсылман дәм татып, еліне алып кететін осы зәмзәм суының құрамын зерттеген ғылым оның қасиетін айшықтай түсті. Қанша су алса да құдық ортаймайды.

Еуропадағы лабораторияларда жасалған зерттеулер нәтижесінде зәмзәм суының құрамында өте аз мөлшерде күкірт бар екені анықталды. Ал АҚШ-та жасалған тест нәтижелері бойынша құрамында микроорганизм және бактерия жоқ, өте таза, сапалы су екендігі анықталды. ДДСҰ тарапынан зәмзәм суы әлемдегі ішуге болатын және денсаулыққа пайдалы ең жақсы су ретінде жарияланды. Оның құрамында микроб, бактерия жоқ және адам ағзасына пайдалы минералдарға бай, кальций және магний тұздарының мөлшері көп.