Бұл аптаның алғашқы жұмыс күні мен үшін облыстық «Сыр медиа» ЖШС-ның ғимаратында бас­талды. Осында әр ауданнан бір топ тілші жаңадан ашылған “Сыр медиа академиясында” кәсіби біліктілігімізді арттыруға, одан әрі журналистік қырымызды шыңдауға және осы салада үлкен тәжірибесі бар мамандардың дәрістерін алуға келдік.

Оқу семинарының алғашқы күні «Сыр медиа» ЖШС бас директоры Аманжол Оңғарбаев аудандық тілшілерге әріптестік байланыс орнатуда, журналистік шеберліктерін шыңдауға, осы саланың тың жаңалықтарымен танысып хабардар болуда академияның атқарар рөлі зор екенін атап өтті. Семинарға қатысушыларға сәттілік тілеп, бір апта ішінде өздерін барлық жағынан дамытуға тырысу қажеттігін айтты. Семинар-тренингтің бірінші күні облыстық «Ақмешіт жастары» газетінің бас редакторы Айжан Абдуллаеваның дәрісінде болдық. Дәріс барысында пунктуацияның ережелерімен, ақпараттың берілуімен және мақалада кездесетін қателіктерге шолу жасалды. Мұнан соң тәжірибеден өтетін редакциялардың жұмыс барысымен таныстық.

Жалпы, біз «Сыр медиа» академиясында өтетін оқу тәжірибеміздің екінші күні «Сыр медиа» ЖШС бас директорының орынбасары, ақпарат саласының үздігі Қаныбек Әбдуов тақырып және идея турасында әңгіме өрбітсе, түстен кейін «Грант Мастер» мектебінің директоры Алмат Қуанышбаев газет сайттарының жұмысын жандандыру, рейтингті көтеру туралы мәлімет беретін болады. Сәрсенбіде облыстық “Сыр бойы” газетінің аға тілшісі Дүйсенбек Аяшұлы аудандық газеттердің мақалаларына шолу жасаса, бейсенбі күні «Қызылорда ньюс» интернет газетінің бас редакторы Дәурен Омаров контент және рейтинг, «Сыр бойы» газеті бас редакторының орынбасары Мұрат Жетпісбаев бейтарап журналистика турасында сабақ өтеді. Ал, оқу семинарының соңғы күні облыс әкімінің кеңесшісі Динара­ Бисембина аналитика туралы дәріс береді. Айта кеткен жөн, біз мұнда түске дейін дәріс алсақ, күннің екінші бөлігінде осындағы облыстық газет редакцияларында іс-тәжірибеден өтеміз. Әріптестермен тығыз байланыс орнатып, әр газеттің жұмыс барысымен, тыныс-тіршілігімен танысамыз. Мен үшін ең қызығы әрі ең қажеттісі – радиостудияның жұмысымен танысу болып отыр. Біз радиостудияда кез келген тақырыптағы мәтін оқу арқылы аудио жазба дайындаудың қыр-сырын меңгеруге де мол мүмкіндік аламыз.

«Сыр медиа» академиясының ерекше жаңалығы – алдағы уақытта журналистика саласының үздіктері, профессорлар, академиктер келіп дәріс оқиды деп күтілуде. Қысқасы, мен осы академияның алғашқы түлегі болғаныма және осындағы аға буын өкілдерінің дәрісін тыңдап, аға басылым «Сыр бойы» газетінде тәжірибеден өтетініме өте қуаныштымын. Оқу семинарында жүрген әр күнімді тиімді пайдаланып осы саладағы біліктілігімді одан әрі көтеруге күш салатын боламын.