МҰНАЙДЫҢ БАҒАСЫ КӨТЕРІЛУІ МҮМКІН
Energy Aspect компаниясының сарапшылары жақын уақыттарда, нақты айтқанда, қысқа қарай халықаралық нарықта «қара алтынның» бағасы көтерілуі мүмкін екендігін болжап отыр. Ал мұның себебі неде? Бұған ең алдымен Венесуэланың мұнай нарығындағы өнімінің азаюы себеп болып отыр. Сондай-ақ, Иранға салынған санкция да бұған әсер етуі мүмкін. Осыған байланысты қолдан жасалынып отырған қысымның салдарынан халықаралық нарықта мұнай бағасы көтерілуі бек мүмкін. Again Capital компаниясының сарапшылары да нарық Иран мұнайын жоғалтатын болғандықтан, WTI және Brent маркасының бағасы 85 немесе 95 долларға жетуі ықтимал деп отыр. Ал Ресей мұнай-газ Одағының президенті Геннадий Шмаль да «қара алтынның» бағасы өсуі мүмкін екендігін жоққа шығармайды. Оның айтуынша, мұнайдың бір баррелі 2018 жылы орташа есеппен алғанда, 70 доллардан артық болуы ықтимал.
Еркін ҚАЛДАН
