Атыраудағы мұздатқышқа салынған сәби өлімі: Үшінші күдікті ұсталды
Атырау облыстық перзентханада жаңа туған нәрестенің көз жұмуына кінәлі үшінші адам анықталды, деп хабарлайды Stan.kz ақпарат агенттігі КТК арнасына сілтеме жасап.
Перзентхананың 53 жастағы акушер-гинекологы қылмысқа қатысы бар деп танылыпты. Перинаталды орталықтың маманының үстіне алдын ала сөз байласу арқылы топтасып, дәрменсіз күйде екенін біле тұра адам өлтіру дерегі бойынша қылмыстық іс қозғалды. Яғни, өткен жылдың 29-шы қыркүйегінде жаңа туған баланы мұздатқыш камераға салған осы кісі көрінеді .
Айта кетерлік жайт, бұл іске қатысты екі адам жауапқа тартылған. Олар - перинаталдық орталықтың бас дәрігері Қуаныш Нысанбаев пен акушер-гинеколог Асқар Қуаныш. Тергеу материалы бойынша Нысанбаев базаға енгізілген мәліметтерді түзетпеу үшін тірі туған сәбиді тоңазытқыш камераға салуды бұйырған. Ең сорақысы бұл жағдайды бас дәрігердің телефонын басқа бір іс бойынша тыңдап жүрген жемқорлыққа қарсы ұлттық бюро қызметкерлері анықтаған. Олар жайтты ести сала орталыққа жеткенімен, шақалақты құтқарып үлгірмеді. Ал Нысанбаев сол түні қаладағы сауналардың бірінде жүрген жерінде ұсталыпты.
Бұған дейін бас дәрігердің телефондағы жазбасы толық жарияланғаны жайлы айтылған еді.
stan.kz
