Бұрынғылар "Бірінші байлық – денсаулық" деп бекерге айтқан жоқ. Деннің саулығы бәрінен қымбат. Бірақ былайғы күндері ауруханаға түспесек, науқастанған адамның халін онша біле бермейміз. Ал әлемде пандемия басталғалы біреу ауруханаға түстім десе, үрейленетін жағдайға жеттік. Әсіресе дәл қазіргі уақытта адамзат өте қиын жағдайды басынан өткеріп жатыр.

Былтырғы көктем мен жаз айла­рын­дағы індеттің соққысы халықты есең­гіретіп кетті. Күз бен қыс айларында бір­шама толастаған сияқты еді, биыл қайта бас көтерді. Көктемнен бері еліміз осы індетпен арпалысып келеді. Ең қиыны, адам ағзасына түскен вирустың мутацияға ұшырап, өте қауіпті түрге айналуы.

2019 жылдан күні бүгінге дейін бірнеше миллион адам тыныс алу мүшелерін зақымдап өтіп, өкпені же­гідей жеп қоятын тәжтажалдың құр­баны болды. Былтыр жақын­да­ры­мыздан бөлек, елімізге танымал қан­­шама тұлғаларымыздан айырылып қалдық. Қос өкпесі қабынып, жасанды тыныс алу аппаратына тәуелді болған қаншама туыстарымыз жанар­лары жәудіреп көз алдымызда жан тапсырды. Соның барлығы жү­регі, сезімі бар адам үшін оңайға соқ­қан жоқ. Қиналып, тығырыққа ті­рел­ген пенденің Алладан басқа жәр­дем­шісі бола ма?! Араны ашылып, жолындағысын жалмап келе жатқан тажал-індеттің алдында өзіміздің сон­шалықты қауқарсыздығымызды анық сезініп, Аллаға жалбарындық. Өйт­кені алғашында бұл індетке медицина қызметкерлерінің өзі араша тұра ал­мады. Шаршады, тіпті көбі өздері де вирус жұқтырып көз жұмды. Дә­рі­ханалардан дәрі-дәрмек таба ал­май, шетел асып іздеп кеттік. Бір жұ­тым ауаға зәру болып жатқан жа­қындарымызға жасанды тыныс алу аппаратын таба алмадық. Бірақ биыл былтырғыдан жағдай сәл басқаша. Үкімет қор жасақтады, дәрігерлер де тәжірибе жинақтады. Алайда уақыт өткен сайын вирус сан алуан түрге еніп, ойрандап жатыр.

Халыққа екпе егу жұмыстары көк­темнен басталды. Өз кезеңі бойынша әлі жалғасып келеді. Айтайын дегенім, бізді індеттен енді тек осы екпе ғана сақтайды. Салдырып жатқан екпелердің барлығы да жыл бойы тәжірибеден өтіп, адам ағзасында ауруға қорғаныш қабатын қалыптастыратын қабілеті дә­­лелденген. Сондықтан әлеуметтік же­лі­лерде желдей есіп, тараған алып-қашпа әңгімелерге сене бермей, бір сәт дәрігерлердің ке­ңесіне құлақ ас­қанымыз да жөн. Иә, Мем­лекет бас­шысының, бас санитардың мә­лім­демелері елдегі эпидахуалға бай­ланысты өзгеріп отыратын шығар, алай­­да олардың да көздегені тек ха­лық­тың саулығы. Сондықтан күн­де­лікті тұрмысымызды карантин талап­тарына бейімдеу және екпе алу – біз­дің бұдан әрі қарай да тіршілігімізді жал­ғастыруымыздың кепілі.