Әр сәт сайын күнделікті шығатын ақпаратқа қарап асқынған дерттің дүмпуін байқап, есеңгіреген ауыр күндер артта қалып, облыстардың көпшілігі қызыл аймақтан шығып, ал біздің Қызылорда облысы жасыл аймаққа өткелі көңіліміз жай тауып, жанымыз бір жадырап, арқа-жарқа болып қалғанымыз рас. Аурудың беті қайтқанмен алаңсыз бейғам жүруге болмайтынын мамандар әрдайым еске салып отырды. Әлі де сақтық шаралары сақталу керек. Жақындарымызды жоғалтып, жүрек сыздаған сәттер әркімнің санасын сансыратады.

2020 жылдан бері біз дерт жайлы біраз сабақ алдық. Ақпарат көздері де арнайы мамандардан сұхбат алып, олардың пі­кір­лерін, кеңестерін ақпараттың ашық кеңістігіне жариялап, елді сақтыққа ша­қырды. Дәрі-дәрмек тапшылығы орын алғанда дертті жандарды емдете алмай жақындарының дегбірі қашты. Әлемді үрей биледі. Тәж-тажал адам таңдамай азуын батыратынына куә болдық. Қазір де жасыл аймақ қатарындамыз. Алайда Ре­сейде бұл дерт қайта бас көтерді деген хабар жетуде. Сондықтан «жаман айтпай жақсы жоқ» деген мақалды бетке ұстап, уақыт таңдамай сап ете қалып, тұтқиылдан шабуыл жасайтын вируспен күресуге сақа­дай сай отыруымыз керек.

Осы мәселелерді назарға алып, об­лыс әкімі Гүлшара Әбдіқалықова ай­мақтағы медициналық және фарма­цев­тикалық ба­қылау мен облыстық сани­та­рия­лық-эпи­­демиологиялық бақылау де­­­пар­та­мент­­­терінің басшыларымен кез­де­­сіп, ат­қа­­­рыл­ған жұмыстарды сара­ла­ған бо­латын.

Медициналық және фармацевтикалық ба­қылау департаментінің басшысы Ғалия Байменованың айтуынша, бүгін­де дә­рі-дәр­мек қорында тапшылық жоқ. «СҚ-Фар­мация» ЖШС дәрілік қой­ма­сын­да ковидке қарсы 3,69 миллион теңгенің дәрі қоры сақ­талған.

Өңір басшысы шалғай елді мекендегі дә­ріханаларда препараттардың қорын тек­серіп, қажеттілікке қарай сараптама жүргізу қажеттігін еске салды.

– Көрші Ресейде эпидемиологиялық жағ­­дайдың ушығуына байланысты бізге де нақты іс-шаралар жоспарын бекі­ту қажет. Әсіресе шалғай ауылдар мен аудандарда дәрі тапшылығының орын алмауын қам­та­масыз ету керек. Тұр­ғындардың ша­ғым­дарын ескеріп, де­пар­таментке түс­кен өтініштер бойынша тек­серу, бақы­лау жұ­мыс­тарын әлде де кү­шейтуді тапсы­ра­мын, – деді облыс әкімі.

Айта кетейік, облыс әкімдігінің қол­дауы­мен фармацевтикалық ұйымдарды қажетті дәрілік препараттармен қам­та­масыз ету үшін 488 миллион теңге қаражат бөлінген. Қазіргі таңда аймақ­тағы 17 мекеме бір жыл­ға 1 пайыз мөл­шер­лемемен несие бе­ріл­гені белгілі болды.

Аймақ басшысы өңірді коронавирус және басқа да инфекциялық ауруларға қар­сы дәрі-дәрмек қорымен толық қам­­тамасыз етуді, халық арасында ковид-19 індетіне қарсы екпе туралы түсін­дірме жұмыстарын жандандыруды тапсырды. Мұнан бөлек балалар ара­сында туберкулез ауруына қарсы вак­цина салдыру мәселесі (БЦЖ) туралы ата-аналар арасында ақпараттық жұмыс­тарды күшейту керектігін айтты.

Облыс басшысының сөзінің жаны бар. Елде қазір екпеге қарсылық пен үрей басым. Олар жылда салынып жүр­ген вакцинадан бас тартып жүргені де байқалады. Реті келгенде айта кету керек, мектептерде ата-анадан рұқсатсыз вакцина салады екен деген жаңсақ пікірлер ғаламторда кездесіп жүр. Ол ресми ақпарат емес. Ешкімнің ескертусіз мектеп оқушысына екпе салуға құқы жоқ. Сондықтан өздерінің жас мөлшеріне сай жылда салынып жүрген екпені алғаны дұрыс екенін мамандар мәлімдеп отыр. Адамның ағзасы әлсірейтін, тұмаудың да жабыса кететін кезі осы күз айы. Жылы кезеңнен салқын ауа райына бірден қа­лыптасып кете алмай, адам әсіресе тұ­мауға бейім тұрады. Сол қауіптен сақтану үшін тұмауға қарсы екпе салдыру өте орынды. Себебі бұл да вирустың бір түрі. Ал пандемия кезінде кез келген ви­рус қауіпті. Бұл – маман дәрігерлердің ескертпесі.

2021 жылы 13 қазандағы жағдай бойынша Қазақстан өңірлеріндегі эпи­де­миологиялық ахуалды бағалау мат­ри­ца­сының мәліметінше, «Қызыл» аймақ­та: Нұр-Сұлтан, Алматы қалалары, Пав­лодар, Ақмола, Солтүстік Қазақстан об­лыстары. «Сары» аймақта: Алматы, Ақтөбе, Қостанай, Қарағанды, Батыс Қа­зақстан, Шығыс Қазақстан облыстары. «Жасыл» аймақта: Шымкент қаласы, Түркістан, Жамбыл, Маңғыстау, Атырау, Қызылорда облыстары.

Өткен тәулікте коронавирус инфек­ция­сын жұқтырған 1707 жағдай тіркелді.Осылайша елімізде коронавирус инфек­циясын жұқтырғандар саны 908847 жетті.

Айта кетейік, 2020 жылдан бері коро­навирус инфекциясымен Қызылорда об­лы­сында 18 255 науқас тіркеліп, 17 427-сі емделіп шықты. Бүгінгі күні аймақта коро­навирус инфекциясымен 28 жағдай тіркеліп отыр.

Ал Жалағаш ауданында жағдай қа­лыпты. Мамандардың айтуынша, ста­цио­нарда 6, реанимацияда 1 науқас ем қабылдауда. Оң нәтижемен тіркелгені – 4, теріс нәтиже – 2. 1 ақпан мен 12 қа­зан аралығындағы мәлімет бойынша тұр­ғын­дардың COVID-19 жұқпасына қар­сы екпенің I компонентін 17544, ал II ком­понентін 12427 адам қабылдаған.

Бүгінде аурухана қорында қорғаныш құралдарынан 94 000 бетперде, 41000 қолғап, 1926 қорғаныш комбинезоны, 282 литр антисептик, 136000 дезинфекциялық дәрі, 400 көзәйнек және өзге де аса қажетті заттар сақтаулы.

Иә, қазақтар «жау жоқ деме, жар ас­тында» деп өте көрегендікпен айтқан. «Көре-көре көсем боласың, сөйлей-сөй­лей шешен боласың» дегендей, бұл дерт­пен де бетпе-бет келіп, пәрменін байқап, тәжірибе жинадық. Сондықтан абай болайық. Қауіпке көзжұма қарап, ертең өкініп қалмайық. Тойды да тойлайық. Бірақ қамсыз қалмай, қауіп барын да ойлайық. «Сақтансаң, сақтайды» дейді ғой көреген қазақ. Ендеше халық айтса, қалт айтпайды.