Бүгін Жалағаш ауданының әкімі Асылбек Шаменовтің қатысуымен Жалағаш аудандық мәслихатының кезекті 16-сессия отырысы болып өтті. Аталған сессия отырысын Жалағаш аудандық мәслихат хатшысы Гүлзат Құрманбаева жүргізіп отырды. Күн тәртібіне 4 мәселе ұсынылып, аудандық мәслихат депутаттарының қолдауымен бекітілді. Олар: Аудан бойынша мәдениет саласының дамуы және оны қолдау шаралары туралы, Жалағаш ауданы бойынша шетелдіктер үшін 2022 жылға арналған туристік жарна мөлшерлемелерін бекіту туралы, Учаскелік сайлау комиссияларын сайлау туралы» Жалағаш аудандық мәслихатының 2019 жылғы 9 қаңтардағы №36-2 шешіміне өзгерістер енгізу туралы және «Жалағаш ауданының әкімдігі жанындағы құқық бұзушылық профилактикасы жөніндегі ведомствоаралық комиссиясының құрамын бекіту туралы» Жалағаш аудандық мәслихатының 2018 жылғы 28 наурыздағы №22-6 шешіміне өзгерістер енгізу туралы.

Ағымдағы жылдың 29 наурыз күні Жалағаш аудандық мәслихаттағы «AMANAT» партиясы депутаттық фракция мүшелерімен бірге аудан бойынша мәдениет саласын дамыту және оны қолдау шаралары талқыланған болатын. Жалпы мәдениет саласының өрісі кең. «Мәдениет – елдің ең басты рухани байлығы, асыл мұрасы. Қай елдің мәдениеті мықты дамыса, сол елдің еңсесі де биік болады», деп бекер айтпаған. Мен осы сессия отырысында мәдениет саласын дамытуға қатысты бірқатар ұсыныстарымды жеткіздім. Мәселен аудан бойынша 16 мәдени ошақтар бар болса, оның ішінде 6 ауылдық клубта дыбыс күшейткіш аппараттардың жоқтың қасы, ал Далдабай және Жаңаталап ауылдарында мүлде жоқ. Осы аталған клубтардың материалдық-техникалық базасын кезең-кезеңімен нығайтуды ұсындым.

Реквизиттер. Яғни қойылымдарға немесе концерттік бағдарламаларға арналған ұлттық нақыштағы сахналық киімдер қоры жеткіліксіз екенін айтып өтіп, өз кезегімде тиісті жұмыстар жасауды ұсындым.

Өскелең ұрпақтың жалындап өсуіне дара жол ашу мақсатында әрбір елді-мекеннен әуез мектептерінің филиалдарын ашып, тиісті мамандармен қамтып, арнайы штат беріліп жұмыстар жасау ұсыныстарын жеткіздім.

Қазіргі таңда Мырзабай ахун және Аққыр ауылдарына ауылдық клуб құрылысын салу мәселесі бойынша тиісті жұмыстар жасалуда. Алдағы уақытта аталған ауылдарда жаңа клуб құрылысы басталатын болады.

Жалағаш ауданының әкімі Асылбек Шаменов депутаттар тарапынан түскен ұсыныстарды назарға алып, кезең-кезеңімен тиісті жұмыстар атқарылатындығын жеткізді.