Бір-бірімізден үйренеріміз көп

Елордадағы Ұлттық академиялық кітапханада Қазақстан халқы Ассамблеясы мен Тайланд корольдігі делегациясының кездесуі өтті. Оған Қазақстан халқы Ассамблеясы Төрағасының орынбасарлары Леонид Прокопенко, Исламбек Салжанов, Мәжіліс депутаттары қатысты.

Таиландтық қонақтармен кез­десудегі әңгіме «Ұлтаралық қа­ты­­настар саласында мем­ле­кет­тік институттар мен азаматтық қо­ғамның ынтымақтастығы» тақы­рыбы аясында өрбіді. Қазақ жеріне алғаш рет келіп отырған қонақтарға қош келдіңіз­дер, дей келе, ҚХА төрағасының орынбасары – Хатшылық мең­ге­ру­шісі Л. Прокопенко оларды ал­дымен Елбасымыздың басшы­лығымен жасақталған қоғам­дық келісім мен татулықтың жал­пыұлттық қазақстандық моделі­мен таныстырып өтті. Ал «Nation-building Institute» институтының төрағасы, Гарвард университетінің профессоры Криенгсак Чароенвонгисак алғаш рет қазақстандықпен танысқан сә­тін еске алды. Сол кезден бері қа­зақ елімен жіті танысуды мақсат тұт­­қан профессор 130-дан астам этнос өкілдері тату-тәтті тұра­тын елге таңданысы мен сүйіні­шін жа­сырмады. Бізді қазақы қо­­нақ­­жай­лылықпен қабылдаған Қа­зақ­­станға ризашылығымызды біл­ді­реміз деген ол, қазақстандық­тар­дың жетістігінің сырына қанық­қысы келетіндіктерін айтып өтті. Брифингке қатысқан Қазақ­стан-Таиланд өкілдері екі елдің эко­номикасы мен әлеуметтік тыны­сындағы, этносаралық қаты­настар саласындағы мемлекеттік саясатты іске асыру мәселелері ту­ра­лы пікір алмасып, бір-бірінен үйре­нетін үлгі көп екендіктерін жеткізді.

Венера ТҮГЕЛБАЙ,

egemen.kz