Теннің өліміне күдікті Қиясов: Қалай жазаласа да көнемін
Мәнерлеп сырғанаушы Денис Теннің өліміне қатысты іс бойынша өтіп жатқан күдіктілердің бірі Нұралы Қиясов кез-келген жазаны тартуға дайын екенін айтты, деп хабарлайды Stan.kz ақпарат агенттігі сот залынан.
Өз сөзінде Қиясов өз әрекеті үшін кешірім сұрап, адам өлтіруді ойламағанын жеткізді.
«Мен сотқа қатысушылардан кешірім сұраймын. Үлкен қателік жасадым. Мұндай болғанын қаламаған едім. Өмірі қанға жоламаған ем. Оксана ханымнан кешірім сұраймын. Ол кісіге қалай ауыр болып жүргенін білемін. Қалай жазаласа да көнемін», – дейді ол.
Айта кетсек, бүгінгі сот отырысында Нұралы Қиясов қайғылы жағдай орын алған күні не болғанын айтып беріп, кінәсін мойындады.
Сот төрағасы Қиясовтың сөзі Құдайбергенов пен Толыбаеваның жауабына, тергеу мәліметтеріне қайшы екенін айтып, неліктен шындықты айтпай отырғанын сұрады. Бұған дейін Қиясов өз жауабын бірнеше рет өзгерткен еді. Бастапқыда ол Денисті Құдайбергеновтің пышақтағанын айтқан. Артынша кінәні өз мойнына алды.
Stan.kz
