Бейсенбіде Сыр өңірінде ашылған «Ақмешіт – адалдық алаңы» жобалық кеңсесінің мүшелері аудандық емхана ұжымымен кездесіп, сыбайлас жемқорлыққа қарсы мониторинг жүргізді.

Басқосуға жоба кеңсесінің басшысы Жандос Тұсмағанбетов, ҚР Мемлекеттік қызмет істері және сыбайлас жемқорлыққа қарсы іс-қимыл агенттігі облыстық департаментінің бас маманы Әлішер ­Амангелдиев, облыстық денсаулық сақтау басқармасының бөлім басшысы Гүлназ Әбілқасымова, аудандық полиция бөлімі басшысының кадр жөніңдегі орынбасары Абзал ­Сералиев, амбулаториялық емханалық қызметі бар аудандық аурухананың бас дәрігері Әсия Бекбергенова және емхана қызметкерлері қатысты.

Жобалық кеңсе мүшелері тұрмыстық сыбайлас жемқор­лық­­­ты жою және азаматтар үшін қолайлы жағдай жасау бағытында баяндама жасап, көп­­­­шіліктің ұсыныс-пікірлерімен бөлісті.

Негізі, тәуелсіз еліміздің әлем­­­­дегі ең дамыған отыз мем­ле­кеттің қатарына енуіне ықпал ететін фактордың бірі – ол, сыбайлас жемқорлықтың алдын алу, оны мейлінше азайту болып отыр. Бұл мемлекеттік саясаттың да басым бағытының бірі. Соңғы жылдары Қазақстан Республикасының Мемлекеттік қызмет істері және сыбайлас жем­қорлыққа қарсы іс-қимыл агент­тігінің бастамасымен елі­мізде, оның ішінде айма­ғы­мызда аталған індетті жою бағытында толымды тірліктер атқарылып, тың жобалар жүзеге асырылуда. Осылай деген жоба жетекшісі Ж.Тұсмағанбетов медицина саласында сыбайластық індетіне жол берілмеу керектігін ескертті.

– Біздің жобалық кеңсе ­Ел­ба­сының­ жемқорлыққа қарсы күрестегі Астана қаласының тәжі­рибесін өңірлерге енгізу туралы тапсырмасына­ сәй­кес­ ашыл­­ды. Мақсат – азамат­тардың мем­лекеттік билік инс­титутта­рына сенімін нығай­тып, ха­лықтың қауіпті кеселге қарсы мәдениетін көтеру. Сондықтан да, жемқорлыққа бәріміз бірге қарсы тұруымыз керек. Басқа өңір­лердегі денсаулық сақтау саласында кейбір келеңсіздіктерге жол берілген. Денсаулығына байланысты жұмысқа уақытша жарамсыз парағын заңсыз және негізсіз беруден сақ болған жөн. Сонымен бірге, кейбір азаматтар жұмысқа қажетті медициналық анықтама парағын жедел рә­сім­деуді өтініп, заңсыздыққа барып жатады. Осындай әре­кеттерге жол бермеуге тиіс­піз. Сондықтан, әркім өзіне жүк­телген міндетті адал атқарып, сыбайластық жем­қор­лыққа қоғам болып қарсы тұ­руымыз керек, – деді ол.

Мұнан соң ҚР Мемлекеттік қызмет істері және сыбайлас жемқорлыққа қарсы іс-қи­мыл агенттігі облыстық де­­пар­­­­­­­­­­­таментінің бас маманы Ә.Амангелдиев пен АПБ бас­шы­­сының кадр жөніндегі орын­ба­сары А.Сералиев, зейнет­кер дәрігер Х.Каметов мүл­­дем төз­­­­­­­­­­беушілік қағидасын қалып­тас­тыру, қызмет көрсету барысында әділдікті ұстану және ұжымда заңсыздыққа жол бермеу қажеттігін және сыбайластыққа қоғам болып қарсы тұру ке­­­­­­­­­рек­тігін айтты.

Жиын соңында жобалық кең­се мүшелері емхана ішін аралап, мұндағы жұмыстарға мони­то­ринг жүргізді. Енді олар осы мазмұндағы түсіндірме шарала­рын құқық қорғау, білім, әлеу­мет­тік салаларда жалғас­тыр­мақ.