Сырдың суы сыралғы, алаңдауға негіз жоқ — әкімшілік

Қызылорда облысында су алу қаупі жоқ. Бұл туралы облыстық жұмылдыру дайындығы басқармасы мәлімдеді, деп хабарлайды Baq.kz ақпарат агенттігі.

Шұғыл ақпарат және мониторинг бөлімі хабарлағандай, қазіргі таңда Сырдария өзеніндегі жағдай бірқалыпты және толық бақылауда. Сонымен қатар, басқарма әр аудандағы жағдайды толық мәлімдеді.
Арал ауданы бойынша: Арал ауданы аумағындағы өзен арнасында мұз толықтай ұстасқан. Мұздың қалыңдығы 30 см құрайды. «Ақлақ» су торабынан төмен қарай 250 м3/сек су жіберілуде.
Қазалы ауданы бойынша: Қазалы ауданы аумағында өзен арнасында мұз толығымен ұстасқан, мұздың қалыңдығы шамамен 68 см. Басықара су торабынан төмен қарай 385 м3/сек су өтуде.
Қармақшы ауданы бойынша: Жосалы кентінен Сырдария бойымен 88 шақырым жоғарыда «Қарасиыр» учаскесінің тұсында мұз ұстасқан, мұздың қалыңдығы шамамен 35 см.
Жалағаш ауданы бойынша: Аудан көлемінде 90% мұз ұстасқан, мұздың қалыңдығы шамамен 40 см.
Сырдария ауданы бойынша: Сырдария ауданы аумағында өзен арнасында мұз толықтай ұстасқан. Мұздың қалыңдығы шамамен 50 см. «Әйтек» су торабынан төменгі ағысқа 255 м3/сек су өтуде.
Шиелі ауданы бойынша: Аудан бойынша мұз ұстасуда, қалыңдығы шамамен 10-15 см.
Жаңақорған ауданы бойынша: Төменарық елді мекені мен Жаңақорған кентінің аралығында мұз ұстасуда, Жаңақорған кенті мен Көктөбе елді мекені аралығында 25-30% күр жүруде. Келіп түсіп жатқан судың көлемі 345 м3/сек құрайды.
Қызылорда қаласы бойынша: «Айтек» су торабы мен Бірқазан елді мекені аралығында мұз ұстасқан, қалыңдығы 15-20 см. Қызылорда су торабынан төмен қарай 320 м3/сек су өтуде.

Baq.kz