Қызылорда қаласында ауыл жас­өспірімдерінің республикалық II жаз­ғы спорт ойындары өтті. Оған бар­лық облыстың құрама командалары қатысты.

Ойын бағдарламасына ұлттық, бұқаралық және олимпиадалық спорт түрі енгізілген. Дүбірлі додада рес­публиканың 14 облысынан 2000-ға жуық ауыл спортшысы шеберлік бай­қасты.
– Сайыс спорттың 10 түрінен өтті. Атап айтсақ, волейбол, шағын-футбол, қазақ күресі, тоғызқұмалақ, еркін күрес, асық ату, грек-рим күресі, дзюдо, таеквондо, гандбол секілді спорттан Қызылора командасы үздік өнер көрсетті. Бұл шараның мақсаты – ҚР Президенті Н.Назарбаевтың «Болашаққа бағдар: рухани жаңғыру» атты мақаласын іске асыру, саламатты өмір салтын насихаттау, ауылдық жердегі жасөспірімдерді дене шынықтыру және спортпен жүйелі шұғылдануға тарту, үздік спортшыларды анықтау, спорт резервін даярлау, – дейді №13 аудандық олимпиадалық резервтің мамандандырылған балалар-жасөс­пірімдер мектебінің әдіскері Есқара Сералиев.
Айтулы спорт бәсекесінің нәти­же­сінде қызылордалықтар жеңіс тұғы­рынан көрінсе, келесі орынға Ал­маты командасы жайғасты. Ал ІІІ орын Түркістан жастарына бұйырды.
Облыс құрама сапында өнер көрсеткен жалағаштық Әсел Бейсенбай дзюдо күресінен І орынды жеңіп алса, Диас Айнабек пен Бекарыс Жаныс ІІ орынды қанжығасына байлады. Сонымен бірге, жерлесіміз Гүлнұр Бақытжан, Әділжан Данияр да таеквондо спорт түрінен үздік өнер көрсетіп, жеңіс тұғырынан көрінді.

Н.АЛПЫСБАЙҰЛЫ.