Қазақтың жаратылысында қайырымдылық қасиет бар. Мұқтаж жандарға қол ұшын беруден алдына жан салмаған халқымыздың осы қасиеті қанынан әлі жоғалған жоқ. Қоғамдағы бір адамға ешқандай өтінішсіз, тапсырмасыз, бұйрықтан тыс өз еркіңмен көмектесу, жақсылық жасау, сол адамның ғана жағдайының оңалуына емес, тұтас мемлекеттің дамуын титтей болса да ілгерілетуге ықпал етері сөзсіз. Әсіресе, бүгінде бұл істе өз азаматтық ұстанымдары қалыптасқан жастарымыз өте белсендік танытып келеді.

Мемлекет басшысы 2020 жылды – «Еріктілер жылы» деп жариялады. Мұндағы мақсат та сол: еліміздің өркен­деуіне, көркейуіне, жеріміздің дамуына шын жаны ашитын патриот жастарды тәрбиелеу. 2016 жылы 22 желтоқсанда «Еріктілер қызметі туралы» арнайы заң қабылданды. Бұл заңдағы еріктілер қызметі жеке тұлғаларға, кәсіпорындар мен компанияларға әлеу­меттік топтарға көмек көрсетуді, қоршаған ортаны қорғауды көздейді, сонымен бірге жастардың бойында азаматтық ұстаным қалыптастырып, оларға әлеуметтік жауап­кершілікті сезіндіруге бағытталған. Өз еркімен атқарылған әрбір істің, жан қалауымен жасалған жақсылықтың нәти­жесі болады. Бүгінде ауданымыздың білім саласында волонтерлер тобы жасақталып, түрлі бағытта жұмыс істеп келеді. Атап айтсақ, аудан мектептерінен 355 оқушы еріктілер тобына тартылған.

Сәрсенбі күні З.Жарқынбаев атындағы №202 мек­теп­тің мәжіліс залында аудан әкімі Қайратбек Сәрсенбаев пен облыстық білім бас­қар­масының тәрбие және өзін-өзі тану бө­лімінің басшысы Мәди Бекма­ған­бетовтің қатысуымен «Біз біргеміз, берік іргеміз» ат­ты аудандық форум өтті.

Қанымызда бар қайырымдылық, қам­қорлық секілді мінездерді қайта жандандыру арқылы елдігімізді нығай­татынымызды және бұл істің басынан жас­тардың табы­луы көңілге қуаныш ұялататынын айтқан өңір басшысы ауданымыздағы ерік­­тілер то­бының атқарып келе жатқан жұмы­сына оң баға берді. Сонымен бірге еріктілер бас қосқан жиында мектеп оқу­шы­ларынан құралған еріктілер тобы «Таза әлем» жобасы бойынша тұр­мыстық қал­дықтарды жинау арқылы ай­мағымыздың сани­тарлық-тазалығына қосқан үлесін, «Қауіпсіз жол» акциясы аясында жас жол инспекторларының атқарған жұмыстары, «Саулық» бағыты бойынша денсаулық сақтау саласымен бірлесіп өткізген «Салауатты өмір салтын сақтайық» атты акциялардың нәтижелері, мектеп оқушы­ларының қолынан шыққан қолөнер бұйым­дарының арнайы ұйымдастырылған көр­мелерде, қайырымдылық шараларында ерекше қамқорлықты қажет ететін оқу­шыларға тарту ретінде берілуі төтенше жағдайлар және орман шаруа­шылығы қызметкерлерімен бірлесіп қауіпті аймақтарға белгілер ұйымдастырып, табиғатты қорғауға атсалысып жүрген еріктілердің жұмысын топ жетекшілері арнайы дайындалған бейнероликтер ар­қылы көрсетіп, бұл шаралардың алдағы уақытта да жалғасатынын жеткізді.

Форум соңын Қайратбек Әубәкірұлы мен Мәди Бауыржанұлы қорытындылап, белсенді жастарға сәттілік тіледі және волонтерлер жылының эстафетасын сал­танатты түрде Жалағаш ауданынан Сыр­дария ауданына табыстады.