Мемлекеттік нышандардың қата­рында ұлттық валютамыз да тұр. Тәуелсіз ел өзге елдің валютасына тәуелді болмауы керек. Осы мақсатта 1993 жылдың 12 қарашасы күні Қазақстан Республикасының Тұңғыш Президенті Нұрсұлтан Назарбаев «Қазақстан Республикасында ұлттық валюта енгізу туралы» Жарлыққа қол қойып, 1993 жылдың 15 қарашасында төл теңгеміз ресми айналымға енді. Содан бері 27 жыл өтсе де, теңге құнын жоғалтпай, ел аумағында өз бағамында қолданылып келеді. Ұлтымыздың тарихи тұлғалары және еліміздің көрікті жерлері бейнеленген алғашқы банкноттар елдің есінде сақталып қалды. Біз үшін төл теңгеміздің ең басты құндылығы да оның сауда айналымындағы қызметі емес, тарихымыз таңбаланған мәнінде болса керек.

Елбасының Жарлығымен 1997 жылдан бері 15 қараша төл валюта­мыздың туған күні әрі қаржы­герлер күні болып белгіленді. Осы атаулы күн қарсаңында аудан әкімі Асылбек Шаменов аудандағы қаржы саласының қыз­меткерлерін қабылдады.

– Мемлекеттік рәміздермен қатар тәуелсіздіктің ең басты белгілерінің бірі – төл валютамыз. Осыдан тура 27 жыл бұрын 15 қараша күні төл теңгені қолымызға ұстап, Қазақстанның тәу­ел­сіз ел болғанын шынайы се­зінген едік. Ол экономика тоқырап, өндірістер жабылған, тіпті қарапайым адамдардың жалақысына дейін сырт­қы факторларға тәуелді болған аса күрделі кезең болатын. Алайда, Елбасы Нұрсұлтан Назарбаевтың сын­дарлы саясатының нәтижесінде елі­міз уақыт сынынан сүрінбей өтіп, төл теңгеміз тәуелсіздіктің айшықты сим­волдарының біріне айналды. Халықтың көңіліне сенім ұялатып, болашаққа нық қадам басуына жол ашты. Әлемдік дағдарысқа лайықты төтеп беретін мызғымас қуатын дәлелдеді.

Содан бері ауданымызда эконо­микалық өсуді қамтамасыз етуге және әлеуметтік проблемаларды ше­шуге бағытталған жұмыстар үздіксіз жүргізіліп, нәтижесінде экономикада тұрақты өсім қалыптасып, даму көрсеткіштері артты. Аудандық бюджеттің салықтық түсімдері жылдан-жылға ұлғайып, бюджет кірісінің өсуіне ықпал етіп отыр. Атап айтқанда, 2010 жылы аудан бюджеті 4 млрд 112 млн теңгені құраса, 2020 жылы бұл көрсеткіш 12,1 млрд теңгені құрап отыр. Осындай жетістікке жетуімізге тәжірибелі, жоғары білікті мамандар еңбек ететін ауданымыздың қаржы саласы қызметкерлерінің еңбегі зор екенін атап өткен жөн.

Міне, осы атаулы күні аудандағы барша қаржы саласының қызмет­кер­лерін кәсіби мерекесімен құттықтап, ел экономикасының дамуына күш-жігерін жұмсап келе жатқан сіздерге алғысымды білдіремін, – деді Асылбек Өмірбекұлы.

Мерекелік жиын соңында аудан басшысы бірқатар қаржы саласының қыз­меткерлерін марапаттап, облыс әкімі орынбасарының және аудан әкі­мінің алғыс хатын тапсырды.