Индустрия және инфрақұрылымдық даму министрлігі жеңілдетілген автокредит бағдарламасын қайта іске қосудың бірнеше нұсқасын қарастырып жатыр.

«Отандық автомобильдерді халыққа қолжетімді ету үшін министрлік жеңілдікпен несие беру бағдарламасына бюджеттен қосымша қаражат бөлу мәселесін пысықтауда», – делінген ведомство хабарламасында.

Бұдан бөлек, президенттің тапсырмасымен халыққа жеңілдетілген автокредит берудің жаңа бағдарламасы әзірленеді.
Қазіргі уақытта бағдарламаны қайта іске қосудың бірнеше нұсқасы қарастырылып жатыр.  
Соның бірі көпбалалы отбасыларды, күш құрылымы қызметкерлерін, дәрігерлер мен мұғалімдерді қолдау жөнінде кіші бағдарламаны қосу ұсынылды.
Сондай-ақ «Бірінші отбасылық автомобиль» кіші бағдарламасын қосу мүмкіндігі қарастырылған.
Жеңілдетілген автокредит бағдарламасы 2015 жылы іске қосылды. Ол 20 жылға есептелген және «жаңартпалы» әдіске негізделген.
Қаржыландырудың жалпы лимиті –  82 миллиард теңге. Бағдарлама іске асырылған сәттен бастап қайтарымды қаражатты ескергенде 159 миллиард теңгеге 30 525 қарыз берілді. 80 мыңға жуық адам отандық автокөлік сатып алды.
Жеңілдетілген автокредит бағдарламасының шарттары:

• 1 жеңіл автокөліктің құны 15 миллион теңгеден аспайды;
• несие мерзімі – 7 жылға дейін;
• қарыз алушы үшін номиналдық сыйақы мөлшерлемесі жылдық 4%-тен аспауға тиіс;
• қарыз алушы банк алдындағы несиесін өтеген кезде қайтарылған қаражат есебінен отандық автокөлік сатып алушыларға қайта кредит беріледі.

Бүгінгі таңда осы бағдарламамен елімізде құрастырылған Hyundai, KIA, JAC, Chevrolet және LADA сияқты автокөліктерді сатып алуға болады.
Sputnik.kz