Аудандық мәдениет және өнерді дамыту орталығында Қостанай, Шығыс Қазақстан облысы және Павлодар өңірінен келген делегация бос жұмыс орындары жәрмеңкесін өткізіп, "Нәтижелі жұмыспен қамтуды және жаппай кәсіпкерлікті дамыту бағдарламасы" аясында Солтүстік өңірлерге ерікті түрде қоныстандыруға шақырды.

Басқосуға кент, ауыл әкімдері, жұмыспен қамту орталығының қызметкерлері мен аудан тұрғындары және жұмыссыз азаматтар қатысты. Жиынды аудан әкімінің орынбасары Рүстем Ержанов жүргізіп, меймандардың сапарына сәттілік тіледі.

Шара барысында делегация мүшелері солтүстік өңірдегі әртүрлі сала бойынша бос жұмыс орындарын ұсынып, ол жақтың тыныс тіршілігімен таныстырды. Сондай-ақ, солтүстік өңірлерге қоныс аударған отбасылар жұмысқа орналасып, тұрғын үйге де қол жеткізе алатындарын жеткізді.

Онда барған отбасылардың қалаған кәсіптерін ашуға да мүмкіндігі бар. Бұған дейін қоныс аударып, сол жақта тіршілік етіп жатқан жерлестеріміздің мектеп жасына дейінгі баласы балабақшаға, мектеп жасындағылар сол өңірлердегі білім ошақтарына орналастырылып, жергілікті денсаулық сақтау және білім беру мекемелерінің есебіне алынған. Бір сөзбен айтқанда, мемлекет қолдауының арқасында екі қолға бір күрек табылды. Оңтүстік жұрты солтүстік өңірлердің жұмыс күшін толықтырды. Ауылдан барған ағайын алдымен ауыл шаруашылығы саласына араласты. Егін екті, мал бақты. Қорасы қойға, қамбасы дәнге толды. Осындай жетістікке қуанған аймақ өкілдері биыл тағы да оңтүстікке жол салды.

– Солтүстік өңірдің табиғатын сөзбен айтып жеткізу мүмкін емес. Орман алқабы мен өзен-көлдері көпті тамсандырады. Кәсіп ашып, мал ұстаймын деген азаматтарға мемлекет тарапынан жеңілдіктер қарастырылған. Бұл үшін шағын несие көлемі 18 млн теңгеге дейін беріледі. Егер сіздің бизнес жүргізу тәжірибеңіз болмаса, онда кәсіпкерлік негіздері бойынша тегін оқытады. Жұмысқа орналасуға, жаңа кәсіп ашуға, көшіп баруға жәрдемдесеміз. Осы мүмкіндікті тиімді пайдаланып, солтүстікке қарай қозғалуға шақырамын, – деді жиында сөз алған меймандар.

Айта кетейік, бұл бағдарламаға қатысушыларға мемлекет тарапынан көшуге және тұрғын үйді жалға алуға, сондай-ақ коммуналдық қызметтерге ақы төлеу шығындарын өтеуге қаржылай көмек беріледі. Мұндай мол мүмкіндікті құр жібергісі келмейтін ауылдағы ағайындар қолайлы жұмыс табылса, қоныс аударуға ниетті екендерін де жасырмады.

Жәрмеңке соңында аудан әкімінің орынбасары Р.Ержанов тұрғындардың ұсыныс-пікірлерімен бөлісіп, солтүстік аймақтарға көшуге ниет болса, ол жақта жұмыс дайын екенін тағы бір еске салды.