Төрт облыста ауа райына байланысты ескерту жарияланды

Қызылорда, Қостанай, Атырау және Маңғыстау облыстарында  ауа райына байланысты ескерту жарияланды, деп хабарлайды ҚазАқпарат Қазгидрометке сілтеме жасап.
12-13 шілде күндері Қызылорда облысының кей аумақтарында солтүстік-батыстан соққан желдің жылдамдығы 15-20 м/с айналасында болады, шаңды дауыл соғуы мүмкін.
12 шілдеде Қостанай облысының кей жерлерінде күн күркіреп, бұршақ жаууы ықтимал. Солтүстік-батыстан соққан желдің жылдамдығы 15-20 м/с-қа жетеді.
Атырау облысында 12 шілде күні күндіз кей жерлерде аптап ыстық болады, ауа температурасы 41 градусқа дейін көтерілуі мүмкін.
12 шілде күні Маңғыстау облысында да аптап ыстық болып, кей жерлерде термометр бағаны 41 градусты көрсетеді.