«Жұмақтың кілті ананың табанының астында». Бұл сөз түсінгенге, көп нәрсені ұғындырады. Табиғаттың оянуы да осынау шуақты мерекемен бастау алатыны тегін емес. Әлемнің Жаратушысы да ешқашан кішірмейтін ана деген асқақ аттың иелерін сондай құрметті етіп жаратып, қырық шырақты әйелдердің ғана кеудесінен екі бірдей жүректі соқтырады. Ана – жер бетіне күн нұрынан артық жылу шашады. Жанарымен жалғанға жылу беріп, пенде атаулының барлығына жүрегіндегі жылылықты арнап, баласының аяғын жерге тигізбейтін де – аналар. Перзенті үшін батпақты да кешіп, биік-биік асуды да бағындырып, жаңбырлы күні панасы, желді күні қорғаны болатын да осы – асыл жаратылыс иелері. Міне, ана құдіретінің қаншалықты екендігі. Бірақ, бұнымен таусылмақ емес.

Кешке аудан басшылығы, өңір тұрғындары қатысты. Салтанатты жиында аудан әкімі Қайратбек Сәрсенбаев әйелдерге құттықтау сөзін арнады.

– Құрметті қауым, ардақты аналар мен қадірлі қарындастар! Сіздерді, ауданымыздың барлық ер азаматтары атынан мерейлі мерекемен шын жүректен құттықтаймыз. Халқымызда барлық жылылық күннің нұрынан, әйелдің аялы алақанынан таралады деген сөз бар. Алтын құрсақ ананың амандығы мен баланың жарқын күлкісі біздің басты байлығымыз. Ана тіршіліктің тірегі, отбасының берекесі. Бүкіл адамзаттың тәрбиешісі, жақсылықтың бастауы. Бүгінде ұрпақ өсірумен қатар, ел еңсесін көтеруде ерекше өз үлестерін қосып келе жатқан қазақ әйелдері қандай құрметке болса да лайықты. Адамзатқа әлемнің жарығын сыйлаған ана алдында барлығымыз да бас иеміз. Сонау ел басына күн туған замандарда ат үстінде жүріп ел қорғаған, ерлердің жігерін жандырып, демеу болған, ошақ отын сөндірмей тұрмысқа бойұсынған қазақ әйелдері тарих бетінен өшпек емес.

Ардақты аналар, аяулы қыз-келіншектер сіздердің ел дамуындағы қосқан өлшеусіз ерен еңбектеріңізге үлкен ықылас білдіріп, көктемнің шуақты мерекесімен құттықтаймын, – деді аудан басшысы Қайратбек Әубәкірұлы.

Мұнан соң, бірқатар сала үздіктері мен нәзікжандыларға аудан әкімінің «Алғыс хаттары» мен мерекелік гүл шоқтары табысталды. Салтанатты шара аудандық мәдениет үйінің көркемөнерпаздарының барша аналар қауымына, ару да аяулы қыз-келіншектерге арналған мерекелік концертімен жалғасын тапты.