Кент орталығындағы №31 мектеп-гимназия ауласында 22 наурыз – Ұлыстың ұлы күніне орай жеміс ағаштары мен сыр талы көшеттері отырғызылды. Оған аудан әкімі Қайратбек Сәрсенбаев, аудан ардагерлері, мемлекеттік қызметкерлер, жастар, аудан тұрғындары қатысты.

- Наурызда ағаш отырғызуды ежелден халқымыз игі дәстүрге айналдырған. «Артыңда мал қалғанша, тал қалсын» деген сөз осыдан қалған болуы керек. Сондай-ақ наурызда көзі ашылған бұлақтың суы сарқылмайды, ал егілген талдың саясы мен жемісі мол болады деп сенген. Сондықтан отырғызылған ағаш көшеттерін көздің қарашығындай сақтап, баптап-күту де ерекше маңызды, - деді аудан басшысы.
Бұл күні 100-ге жуық көшет отырғызылды.
Айта кетейік, биылғы жылы Жалағаш кентінің өзіне биыл 3000-ға тарта ағаш көшеттері, 4000-ға жуық қаламшалар отырғызылмақ.