13 АДАМ ОПАТ БОЛДЫ
27 наурыз күні аудан территориясында апатқа ұшыраған МИ-8 тікұшағы барша қазақ жұртының қабырғасын қайыстырды. Ақтаудан Шымкентке бет алған тікұшақ бортындағы 13 адамның барлығы қаза тапты. Марқұм болғандардың12-сі Ақтаудағы 30153 әскери бөлімінде қызмет еткен.
ҚР Қорғаныс министрі, генерал-майор Н.Ермекбаев Ми-8 тікұшағы апатқа ұшыраған жерге келіп, оқиға орнында жұмыс жасап жүрген мамандардың баяндамаларын тыңдады. Қорғаныс министрі авиациялық апаттың себептері толық анықталғанға дейін бір типті тікұшақтардың (Ми-8, Ми-17, Ми-171) ұшуларын тоқтатуды, сондай-ақ, «Алтын жебе» оқу-жаттығуы барысында осы тікұшақ типтерінің қолданылуын топшылайтын іс-қимылдарды тоқтатуды, авиациялық апатты жан-жақты әрі дәйекті тергеп-тексеруді ұйымдастыру мен өткізуді, ұшуды қамтамасыз етуге қатысқан барлық қызметтер мен лауазымды адамдардың іс-қимылдарына баға беруді, авиациялық апатқа әкеп соқтырған барлық жағдайды анықтауды тапсырды. Мұнан бөлек, ауа райының қауіпті құбылысына тап болған жағдайда әрекет ету тәртібі бойынша ұшу және инженерлік-техникалық құраммен қосымша тренаж ұйымдастыру қажеттігін ескертті.
Біз де оқиға орнына арнайы барып, куәгерлермен тілдескен едік. Ал, апат болған жерге БАҚ өкілдерін арнайы жасақталған күзет тобы кіргізбеді. Шамамен 2,5-3 сағаттай уақыт ішінде оқиға орнына экипаж мүшелерінің туысқандары да келіп жетті. Бірақ, оларға да ол жерге бару мүмкін болмады. Ал, жергілікті тұрғындардың бірі кешкілік бір жарылған дауысты естігенін айтады. Артынша апат болған жерге ТЖД көліктері келіп жеткен. Облыстық денсаулық сақтау басқармасы мамандарының айтуынша, ем жүргізілген науқастар жоқ. Бортта болған адамдардың бәрі қаза тапқан.
Бұл қаза барша қазақ жұртына оңай тиген жоқ. Ел тыныштығын күзетіп жүрген оннан астам оғлан опат болды. Қайғылы оқиғаға қатысты Мемлекет басшысы да, Елбасы да көңіл-қосын білдірді. Редакция ұжымының атынан біз де марқұм болғандардың туған-туыстарына, барша қазақ жұртына қайғырып, көңіл айтамыз.
«ЖЖ» ақпарат.
