Ауданда бейнелеу өнерінің шеберлері көп. Әр қайсысының шығар­ма­шылығын бөліп-жарып қарауға болмайды, өзіндік бояуларымен ерекшеленеді, стиль алуандығымен құнды. Солардың ішінде жас суретші Ерболат Жапақовтың шығар­ма­шылығын ерекше атап өтуге болады. Ерболат Қорқыт Ата атындағы Қызылорда мемлекеттік университетін сызу-бейнелеу бөлімі бойынша тәмамдаған. 2009 жылдан бастап аудан орталығындағы өзі білім алған З.Жарқынбаев атындағы №202 орта мектепте мамандығы бойынша абыройлы қызмет етіп келеді.

Кейіпкеріміз бейнелеу өнерінің графика, живопись, натюрморт, портрет, пейзаж, мүсін, сәндік қолданбалы өнер, сәулет өнері, мозайка секілді барлық жанрларына көп мән береді. Өзінің айтуынша, осылардың ішінде барельеф жанры кенжелеп қалған сыңайлы. Сондықтан бейнелеу өнерінің осы аталған жанрын кеңінен насихаттауды қолға алыпты. Мектепішілік көрмелер өткізіп, оқушыларына да үйретіп келеді.

– Барельеф – бедерлі мүсіннің бір түрі. Француз тілінен сөзбе-сөз аударғанда "аласа бедер" деген мағына береді. Ауқымды кескін, техникалық негіз әрі фон болып табылатын тегіс бетке салынады. Кескін композициясы негіздің тұтастығын сақтай отырып, оның жарты қалыңдығындай мөл­шерде шығыңқы тұрады. Баре­льеф­тің кескіндік және өрнек­тік түрлері де болады. Ол сәулет құрылыстарында, безендіру туын­дыларында, ескерткіштердің тұғы­рында, ұстын, мемориалдық тақ­таларда, медальдар мен металл валюталарда, глиптикада, яғни тастан қашалған бұйымдарда қолданылады. Сондай-ақ өз алдына жеке өнер туындысы ретінде де кездеседі. Міне, мен осы барельеф жанры бойынша жұмыс жасаймын. Өнердің қай түрі де адамға ләззат сыйлайды. Алайда көрген көзге ерекше әсер беретін осы бедерлеп бейнелеу өзімнің жаныма жақын. Ең бастысы, барельеф оқушылардың да қызығушылығын оятты. Ал өнер­ге жақын, оның құпия сырларын, тылсым құдіретін сезініп, бойына сіңіріп өскен баланың ешуақытта жүрегі қатаймайды, теріс жолға түспейді, – дейді өнер иесі.

Өнер – қанмен даритын қасиет. Ерболаттың әкесі Жапақов Бектас ағамыз ұзақ жылдар білім саласында табанды еңбек етіп, зейнеткерлікке шыққан. Ауданымызға белгілі суретші. Ол кісінің тәрбиелеген шәкірттері бүгінде аймаққа белгілі қылқалам шеберлері. Ерболат Жапақов та өзінің өнердегі алғашқы ұстазы әкесі екенін айтады.

– Менің бойымдағы бұл өнер әке қанымен, ана сүтімен дарыған шығар. Өйткені бала күнімнен әкемнің қатал тәрбиесін алумен қатар, ол кісінің өнер жолын да өзіме үлгі тұтып, ықыласпен үйрендім. Әкем де мені өнерге баулудан, оның қыр-сырын үйретуден ешқашан жалыққан емес. Ол кісі ең алдымен ұстаз. Сондықтан мен де мейілінше әкемнің, ұстазымның үмітін ақтауға тырыстым, – дейді Е.Жапақов.

Иә, бүгінде Ерболаттың өзі де ұстаз, шәкірт тәрбиелеп ке­ле­ді. Жетістіктері де жоқ емес. Жуырда ғана бір шәкірті аудандық "Бояулар құпиясы" тақырыбында өткен сурет көрмесінен көп талапкердің арасынан топ жарып, жүлделі орын иеленді. Ұстаз үшін, соның ішінде өнер адамы үшін шығармашылығының өрлеуі мен шәкірттерінің жетістіктерін көруден асқан бақыт жоқ.