» » » ҚАЗАҚТЫҢ АСЫЛ НАРЫ

ҚАЗАҚТЫҢ АСЫЛ НАРЫ



Темірбек Жүргеновтің есімі жалғыз қазаққа ғана емес, иісі түркі жұртына мәлім. Жалағаш ауданы, Жаңаталап ауылында дүниеге келген ол ойы ұшқыр, қаламы қарымды, пуб­лицист, сыншы әрі көсемсөз иесі. Қазақстандағы мәдениет, әдебиет, өнер саласының талантты ұйымдастырушыларының бірі, көрнекті қоғам қайраткері Темірбек Қараұлы өмірінің соңына дейін қазақ халқына, еліне адал қызмет етіп, үлкен құрметке ие болды. Биыл мемлекет және қоғам қайраткері Темірбек Жүргеновтің өмірге келгеніне 120 жыл толып отыр.

Аудандық мәдениет және өнерді дамыту орталығында Алаш қай­рат­керінің 120 жылдығы қарса­ңын­да «Алып өнердің асыл нары – Темір­бек Жүргенов» атты 9-10 сынып оқушы­лары арасында Жүргенов оқулары облыстық байқауы өтті. Байқауға аймаққа қарасты аудандардан келген оннан аса оқушы қатысты. Шарада сөз алған аудан әкімінің орынбасары Жағыпар Тажмаханов қоғам қайрат­керінің өнегелі өмір жолына тоқталып, қатысушыларға сәттілік тіледі.
– Биыл мемлекет және қоғам қайраткері Темірбек Жүргеновтің 120 жылдығы. Саналы ғұмырын мем­лекетіміздің өркендеуіне, туған жері­міздің көркеюіне арнаған тұлға­ларды өскелең ұрпақ білу қажет. Ал, аға буынға құрмет көрсету біздердің алдымызда тұрған міндет. Темірбек Жүргеновтің еңбектеріндегі рухани ұлттық мұраны, елдік-ерлік құндылықтарды насихаттау мақса­тында өткізіліп отырған облыстық бай­қаудың маңызы зор. Бүгінгі айтулы шараға алыстан ат терлетіп келген, қолына қалам ұстап, сөз өнерін серік еткен жас өрендерге сәттілік тілейміз, – деді аудан әкімінің орынбасары.

Көркемсөз оқу шеберлерінің облыс­тық байқауына Темірбек Жүр­генов атын­дағы қоғамдық қордың төра­ғасы Сәби Аңсат, «Қазақ тілі» қоғамдық бір­лестігінің төрайымы Дина Мирман, ақын, сазгер, Қазақстан Журналистер одағының мүшесі Айкүміс Орынбаева, ақын, Қазақстан Жазушылар және Журналистер одағының мүшесі Ғазиза Әбілда қазылық етті.
Тарихтан тағылым теріп, өткенін еске алып, бүгінін ұлықтаған, талантты ұл-қыздар мемлекет қайраткерінің есімін тағы бір тұғырға көтеріп, ұлттық рухқа бай мол мұрасын кеңінен насихаттады. Байқау барысында қатысушылар Темірбек Жүргеновтің саналы ғұмы­рында атқарған елеулі істеріне зерттеу жасап, өткен ғасырда «Темір-Нарком» атанған қоғам қайраткерінің ең­бектерінен үзінділер оқыды. Сондай-ақ, шарада Т.Жүргеновтің Қазақ­стан­да алғашқы музыка театрын ұйым­дастыруға үлкен үлес қосқандығы айтылып, еліміздегі мектеп жүйесін реттеуге және қазақ орта мектептерінің санын арттыруға атсалысқандығы айтылды. Байқауға қатысушылардың сөз саптауынан, қайраткер өміріне тоқталып, еңбектерін бар ынтасымен жеткізуінен Жүргеновтің өмір жолын толық оқып, барлық еңбектерімен танысқандығы көрініп тұрды. Әрбір қа­­тысушы Қазақстан мен Орта Азия рес­­­­­публикаларындағы оқу-ағарту, мә­­де­­ниет және әдебиет саласының өр­кен­деуіне өлшеусіз үлес қосқан көр­нек­ті мемлекет және қоғам қайрат­кері ту­ралы үздік үзінділер оқып, қалың көп­шіліктің қошеметіне бөленді.
Қазылар алқасының шешімімен жыр бәйгесінде көп ішінен дараланып, оза шапқан үздіктер анық­талды. Бас жүлдені жалағаштық Нұрай Тыныш­тықбай иеленді. Ал, қармақ­шылық Бекзат Төлепберген І орын, қаза­­лылық Көркем Дінберген ІІ орын, шиелілік Ақжарқын Ахметжан ІІІ орын алды. Қал­ған қатысушылардың бар­лығына ар­найы диплом мен ынталандыру сый­лығы табысталды.

Нұржамила АЛМАСҚЫЗЫ,
М.АХМЕТОВ (сурет).­
20 қазан 2018 ж. 1 263 0