Мереке қарсаңында көршілерінен тәтті сұраған 5 жасар балаға есірткі қосылған мармелад берген
АҚШ-тың Огайо штатында Хеллоуин мерекесінің қарсаңында көршілердің үйіне аралап, тәттілер жинаған бала ауруханадан бір-ақ шықты.
Бұл туралы The Independent басылымына сілтеме жасап Stan.kzхабарлайды.
5 жасар Брейлен Каруэлл өзіне берліген мармеладты жегеннен кейін өзін нашар сезіне бастағанын айтқан. Баланың сөзінше, ол шұлығын киіп жатқан кезде денесі қалтырап, артынша қолы мен саусақтарын қимылдата алмай қалған.
Артынша әкесі ұлын ауруханаға алып барыпты. Дәрігерлер баланың зәрінен метамфетамин тапқан. Нәтижесінде Брейлен ауруханада 7 сағат жатқан. Ал ол жинаған тәттілердің бәрі сараптамаға жіберілді.
Баланың ата-анасы Джулия мен Камбрей бұрын есірткіге тәуелді болған екен. Олар есірткі шекпегеніне бірнеше жыл болғанын айтып ақталды. Алайда айналасындағылар оларды шындықты жасырып отыр деп айыптауда.
«Мен ұлыммен болған жайтқа қатысты тек шындықты айтып отырмын. Менің және күйеуімнің отбасындағы ешбір адам балаға есірткі бермес еді», – дейді Джулия
Оның сөзінше, ата-ананың міндеті – өз балаларын қорғау. Алайда баланы өмірде болатын барлық жайттан қорғау мүмкін емес, сондықтан мұндай жағдай туралы өзгелер де білуі керек, дейді ол.
Stan.kz
Пікір 2