Жалағаштықтар мемлекеттік бағдарламаны тиімді пайдалана отырып, кәсіпкерлік саласын дамытуға өз үлесін қосу арқылы табысын еселеп отыр. Бұл бір жағынан жергілікті түсімде өсім қалыптастыру үшін таптырмас мүмкіндік екені де анық. Былтыр салаға қадам басқандар нәтижелі еңбегімен кірісін еселесе, енді бірі кәсібінің көкжиегін кеңейту арқылы бос жұмыс орындарын ашуға қол жеткізді. Биыл алғашқы алты айда ауданда шағын және орта кәсіпкерлік субъектілерінің саны 2 433-ке жеткен. Бұл көрсеткішті былтырғымен салыстырсақ, 4,2 пайызға артқанын айқын аңғарамыз. Қазіргі таңда ауданда 2 232 кәсіпорын нақты жұмыс жасап тұр. Бұлардың да саны былтырғымен салыстырғанда 3,6 пайызға артқан.

Салада өндірілген өнім көлемі де жаман емес. Мәселен, биыл 6 айда Жа­­­ла­ғашта өнеркәсіп өнімі 5 млрд тең­геге жетіп, өндірілген өнім көле­міндегі өсім 1,9 есеге артты. Ал өңдеу өнеркәсібі 3,9 млрд теңгеге орындалып, 2,2 есеге артқан.

Қазіргі таңда аудан тұрғындары мем­­­ле­кет­тік бағдарламалар арқылы ша­ғын және ор­та кәсіпкерлікті бас­тау­да және дамытуда бел­сен­ділік та­ны­туда. Нәтижесінде жыл басынан бері 126 жоба 1 млрд 557,8 млн тең­гемен қар­жы­ландырылды. Мем­ле­кеттік қол­дау­дың нәтижесін кәсіп­керлер ғана емес, қалың жұрт көріп отыр. Өйткені осын­ша қолдаудың ар­қасында өңірде 171 адам жұмыспен қамтылған.

«Бизнестің жол картасы – 2025» мем­­лекеттік бағдарламасы аясында екін­ші деңгейлі банктердің облыстық фи­лиалдары арқылы 21 жоба 253,4 млн теңгемен қаржылай қолдау тап­­ты. Оның ішінде 11 жоба 99,4 млн тең­­геге ішінара кепілдендірілген. Сон­­­­­­­дай-ақ оның пайыздық үстем­ақы­­­сы бағдарламаның шартына сәй­кес суб­сидияланды. «Еңбек» бағ­дар­­­ла­ма­сы аясында да жыл басы­нан 36 жоба 146,7 млн теңгемен қар­жы­ландырылды. Мұнан бөлек «Ауыл ша­руа­­шылығын қаржылай қолдау қоры» АҚ-­ның облыстық филиалы арқылы 3 жоба 47,6 млн теңгеге қаржылай қолдау тапқан.

Өңірде «Агробизнес» бағдарламасы ая­сын­да «Ауыл» несие» серіктестігі ар­қылы 25 жобаның авторы да 319,9 млн теңгеге қол жет­кізген болатын. Сондай-ақ «Сырдария-1» несие се­ріктестігі ар­қы­лы да 12 жоба авторына 269,8 млн теңге үлестірілген.

«Қарапайым заттар экономикасы» бағ­дар­ла­масы аясында 3 жоба егін егу жұмыстарын жүргізуге 86,4 млн теңге қаржылай қолдау тапты. Ал «КазАгроҚаржы» АҚ-ның облыстық филиалы арқылы 5 шаруа қожалық 289,7 млн теңгеге қол жеткізді.

Мұнан бөлек Жалағашта соңғы жыл­­дары кә­сіпке енді қадам бас­қан жұмыссыз азаматтарды да қайта­рым­сыз грантпен қамтамасыз ету қарқын алды. Мәселен, биылдың өзінде 50-ден астам жоба авторына 583 600 теңгеден бе­рілген болатын. Олардың бірі ауыл ша­руашылығы саласында табыс табуға та­лаптанса, енді бірі тігін цехын ашып, халыққа қызмет көрсеткісі келеді. Сон­дай-ақ кондитерлік өнім өндіруді де өз жобасына арқау еткендер жоқ емес. Бас­тысы мұның көбісі қазіргі таңда өз тұтынушыларын сапалы өніммен қам­тамасыз етуде.

Қайтарымсыз қаражатқа ауылдық елді мекендер тұрғындары да ие бо­лу­да. Әсіресе ауылдық жерлерде жұ­мыс­­сыз­дық деңгейін төмендету ма­ңызды рөл атқаратынын ескерсек, мұның бір жа­ғы­нан әлеуметтік саланы қолдауға да сеп болғанын аңғарамыз. Оның үстіне қа­зір ауыл тұрғындары да кәсіп ашудың пай­да­сын жетік меңгерген.

Былтыр да бұл сала жақсы жетіс­тік­пен қорытындыланды. Биыл да іс бас­тауға талпынғандардың талабы жа­ман емес. Бастысы кәсіпкерліктің күре­та­мырына қан жүгірткен мемлекеттік бағ­дарламаның пайдасын халық қазір жақ­сы түсінген. Содан да болар, бүгінде кәсіптік оқуын жетілдіріп, көмектің бұл түріне қол жеткізуге асыққандар саны да артуда.