Бұған дейін аудан әкімі Асылбек Шаменов ауылдық елді мекендерге барып, әлеуметтік нысандардың жылу маусымына дайындығымен танысқан еді. Білім және денсаулық, мәдениет саласына тиесілі ғимараттарда болған өңір басшысы жауапты мамандарға жылу маусымына дайындық жұмыстары кезінде мейлінше сапаға мән беруді тапсырып, қатты және сұйық отындарды уақытылы әрі жеткілікті етіп алып қоюды қаперге салған болатын. Кешегі аппарат мәжілісінің күн тәртібінде қаралған мәселелердің қатарына осы жылу маусымына дайындық барысы да бар. Бұл туралы баяндаған аудандық тұрғын үй-коммуналдық шаруашылық және автомобиль жолдары бөлімінің басшысы Өмірзақ Елеусінов атқарылған жұмыстарды пысықтап, алдағы уақытта кейбір жылу қазандықтары ауыстырылатынын атап өтті.

Мәжілісте мұнан бөлек ауданның әлеуметтік-экономикалық даму көрсеткіштерінің 9 айда орын­далуы, “Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған “Еңбек” мемлекеттік бағдарламасының орындалуы және кәсіпкерлікті дамыту бағытында атқарылған жұмыстар қаралды.

Күн тәртібіндегі бірінші мәселе бойынша баян­дама жасаған аудандық экономика және бюд­жеттік жоспарлау бөлімінің басшысы Жұпар Баймаханова макроэкономикалық көрсеткіштер бойынша өсім қалыптасқанын жеткізді. Бөлім басшысы үш көр­сет­кіш бойынша орындалу барысы төмен екенін де жасырмады.

Мәжілісте “Нәтижелі жұмыспен қамтуды және жаппай кәсіпкерлікті дамытудың 2017-2021 жыл­дар­ға арналған “Еңбек” мемлекеттік бағдар­ламасының ауданда орындалу барысы да қаралды. Бұл жайында баяндама жасаған аудандық жұмыспен қамту, әлеуметтік бағ­дарламалар және азаматтық хал актілерін тіркеу бөлімінің басшысы Эльмира Құттымбетова қайтарымсыз қаражатқа ие болған жергілікті халықтың басым бөлігі бүгінде қолға алған жобаларының жемісін көріп отырғанын жеткізді.

Күн тәртібіндегі келесі мәселе ауданда кәсіп­керлік саласын дамыту бағытында атқарылған жұ­мыстар болды. Бұл жөнінде баяндама жасаған аудандық кәсіпкерлік, өнеркәсіп және туризм бө­лімінің басшысы Ғабит Ерболұлы әлі де бұл бағытта жұмыстар атқарылатынын жеткізді.