АУДАН БЮДЖЕТІНЕ ӨЗГЕРІСТЕР ЕНГІЗІЛДІ

Сессияда Аламесек ауылдық округінің әкімі Н.Опабековтың Есет батыр ауылындағы кейбір көшелерді қайта атау туралы, Еңбек ауылдық округінің әкімі Қ.Қалдановтың Еңбек ауылындағы Ғани Мұратбаев тұйық көшесін қайта атау туралы, Қаракеткен ауылдық округінің әкімі Қ.Өлментаевтың Қаракеткен ауылындағы кейбір көшелерді қайта атау туралы, Аққыр ауылдық округінің әкімі Ж.Матаевтың Аққыр ауылындағы Аққыр көшесін қайта атау туралы хабарламалары тыңдалып, бекітілді.
Сессия жұмысын қорытындылаған аудан әкімі Қ.Сәрсенбаев 2018 жылдың басында аудан бюджетінің болжамы 7,1 млрд теңге болып белгіленсе, қазіргі кезде бұл көрсеткіш 8 млрд 70 млн теңгеге өскенін жеткізді. Республикалық, облыстық бюджеттен бөлінген бұл қаржыға биыл аудан орталығындағы Абай, Бұқарбай батыр атындағы көшелерді жөндеу жұмыстары басталды, ал, кезекте тұрған қалған көшелерді жөндеу кезең-кезеңімен жалғасын табатын болады. Кезінде асар әдісімен салынған аудандық аурухананы заман талабына лайық етіп жаңадан салатын уақыт жетті. Аудан халқының тілегіне орай жаңа аурухананың сметалық жоба құжаттары дайын, биыл құрылыс жұмысын бастау жоспарланып отыр. Сондай-ақ, ауданды газдандыру бағытындағы алғашқы дайындық жұмыстары жүріп жатыр.
Бұдан әрі өңір басшысы аудандағы жағымды жаңалық: өткен аптада аудандық ішкі істер бөлімінің ғимараты жаңадан салынып, пайдалануға берілгенін, биылғы жылғы ҰБТ-ның қорытындысымен аудан мектептері бойынша орташа балл 87,4 құрап, жоғары көрсеткішке қол жеткенін айтып өтті. Аудан мектептерінің білім сайысындағы бұл жетістігі – ұстаздар қауымының ізденісі мен тынымсыз еңбегінің жемісі екенін атап өтіп, алдағы қыс маусымына әзірлік барысын пысықтады.
Қорытынды сөзінің соңында Қайратбек Әубәкірұлы сессияға қатысушыларды ауданда атқарылып жатқан ауқымды жұмыстарды халық арасына жеткізіп, насихаттауға және биылғы жылы мемлекет және қоғам қайраткері Т.Жүргеновтің 120 жылдығы мен Социалистік Еңбек Ері Ұ.Еспановтың 90 жылдық мерейтойларын толымды тартулармен қарсы алып, жоғары дәрежеде өткізуге атсалысуға шақырды.
«ЖЖ» ақпарат.