Өңірдің әлеуметтік-экономикалық дамуы тұрақты

Бюджет қаржысының басым бөлігі әлеуметтік салаға арналған. Бұл туралы өңірлік коммуникациялар қызметінде өткен баспасөз мәслихатында облыстық экономика және бюджеттік жоспарлау басқармасының басшысы Сәуле Құлымбетова мәлімдеді.
– Аймақ тайқазанындағы қара­жаттың басым бөлігі әлеуметтік салаға бағытталған. Денсаулық сақтау, білім және әлеуметтік жүйелердің дамуына қаржы бөлуді жалғастырамыз. 2017 жылы облыс бюджеті 223,9 млрд теңге сомасында қалыптасып, бекітілген бюджетпен салыстырғанда 14,9 млрд теңгеге өсім болды. Айта кетейік, бюджет шығындары жан басына шаққанда аймағымыз рес­публика бойынша 7-орында, ал әлеуметтік сала шығындары бойынша 1-орында, – деді Сәуле Ибрагимқызы.
Соңғы он жылда облыс­та халық саны 150 мың адамға көбейді, сөйтіп 2017 жылдың желтоқсанында 782,1 мың адамды құрады. Облыс бойынша статистика департаментінің басшысы Мариям Баекееваның хабарлауынша, былтыр 17 мыңнан аса бала дүниеге келген. Олардың арасында қызға қарағанда ұл балалардың үлесі басым.
– Олардың ішінде 136 жұп егіздер бар. Осыған дейін статистика бойынша 1000 қыз балаға 999 ер баладан келуші еді. Енді былтыр дүниеге келген сәбилердің ішінде ер балалар көп. 1000 қыз балаға 1004 ер баладан болып өзгерді, – деді М.Баекеева.
Жалпы өңірдің әлеуметтік-экономикалық дамуы тұрақты. Өткен жылы экономика салаларын­да 13105 жаңа жұмыс орны құрылса, оның ішінде 11561 тұрақты жұмыс орны. Жұмыссыздық деңгейі жыл көлемінде 4,8 пайыз­дық деңгейде тұрақталып тұр. Өткен жылдың тоғыз айындағы ор­таша айлық жалақы көлемі 121,1 мың теңге болып, алдыңғы жылдың кезеңімен салыстырғанда 4,4 пайызға өскен.

Шынар БЕКБАН,
«Сыр бойы».