ЕРІКТІЛЕР ЕҢБЕГІ ЕШ КЕТПЕЙДІ

Жалағаштық еріктілер тұрмысы төмен отбасыларға көмек беруді, әлеуметтік нысандар құрылысының қалануына қолғабыс жасауда белсенділік танытып келеді. Осыған дейін Аққұм, Есет батыр сияқты ауылдық елді мекен жастарының үлкендерге көмек беруде аянып қалмағанын айтқан болатынбыз. Қазіргі таңда мұндай шараны эстафета секілді өзге өңірдің жастары да жалғай әкетті. Кеше игі шара Жалағаш ауданында жалғасты.

Кент жастары бұл жолы орман шаруашылығы қызметкерлерімен бірге Сырдария өзенінің жағалауында тазалық жұмыстарын жүргізіп, қоқыстарды жинастырды. Олардың түсінігінде жастар қоғамда өзінің жауапкершілігін сезінуі және пайдалы істермен ғана айналысуы тиіс. Табиғатқа жанашырлықпен қарауды мақсат еткен еркітілер жалағаштықтарды табиғатты ластамауға, айналамызда тазалықты сақтауға шақырды.