КӨГІЛДІР ОТЫН: КӨПТЕН КҮТКЕН ШЕШІМ

Мемлекет басшысы Н.Ә.Назарбаевтың Қазақстан Республикасының Парламенті палаталарының бірлескен отырысында жариялаған «Президенттің 5 әлеуметтік бастамасы» атты үндеуі халықтың жағдайын жақсартуды көздейді. Соның ішінде бесінші бастама – орталық және солтүстік өңірлердегі елді мекендерді газбен қамтамасыз етуді жалғастыру бүгінге дейін өз шешімін күткен мәселе еді. Яғни, Елбасы Астананы газдандыру туралы нақты тапсырма берді. Магистралдық газ құбырының ұзындығы 1081 шақырым болмақ. Ол «Бейнеу-Бозой-Шымкент» газ құбырының Қызылорда облысы аумағындағы «Қараөзек» компрессорлық станциясынан бастау алады. Өндірісі дамыған Жезқазған, Қарағанды, Теміртау өңірлері арқылы Астанаға дейін жүргізіледі. Осы бағытта газ құбырын салу арқылы 2,5 миллионға жуық тұрғынды газбен қамтамасыз ету жоспарланып отыр. Газ – экологияны сауықтырады. Мыңдаған жұмыс орнын ашуға мүмкіндік береді. Сонымен бірге тұрғындардың өмір сапасын жақсартуға, әлеуметтік жағдайын көтеруге, шағын және орта бизнесті дамытуға ықпал етеді. Мәселен, көгілдір отынға көшу арқылы тек Астананың өзінде зиянды қалдықтардың ауаға таралуы 6 есе азаяды екен.

Елордамыз Астананы газдандыру Сыр өңірінен бастау алатыны – біз үшін үлкен қуаныш. Нақты айтар болсақ, бұл – жобалық құны 370 миллиард теңге болатын инвестиция, ең бастысы жаңа жұмыс орындары ашылады. Жоба бойынша кемінде 200 қызылордалық жұмыспен қамтылады делініп отыр.
Жуырда аймақ басшысы Қырымбек Көшербаев бүгінгі таңда облыс халқының 63 пайызының табиғи газ тұтынуға мүмкіндігі бар екенін айтты. Яғни, 7 аудан орталығының 4-еуіне газ жеткізілген. 2017 жылы Белкөл кентін газдандыру аяқталды және Байқоңыр қаласына газ тарту жұмыстары басталды.
– Осы жылы біз Жосалы кентін газдандыру жұмыстарына кірісеміз және соңғы аудан орталықтары – Жалағаш, Тереңөзек кенттеріне газ құбырын жеткіземіз, келесі кезек – елді мекендердікі, – деді аймақ басшысы.
Тереңөзек кентінде АГТС құрылысын бастауға бюджеттен 1,7 млрд теңге бөлініп, «ТрансАзияКонстракция» мекемесі құрылыс-монтаж жұмыстарын бастады. Ал Тереңөзек АГРС-нан Жалағаш ГГРП-на дейін жоғары қысымды газ құбыры бұрмасының, Жалағаш кентіне газ жеткізу құбырының, кварталішілік желілерінің жоба сметалық құжаттамасын әзірлеуге және мемлекеттік сараптама қорытындысын алуға қаржы қаралып, мемлекеттік сатып алу конкурсы жүргізілуде. Қорытындысы наурыз айының аяғына дейін белгілі болады.
Экологияны сауықтыру, халықтың әлеуетін арттыру мақсатында елді газбен қамтамасыз етуді жалғастырудың маңызы зор. Сондықтан бұл жоба халықтың өмір сапасын жақсартудың, жарқын болашақтың кепілі. Көп ұзамай өзекті мәселе оң шешімін тауып, аудан халқы да көгілдір отынның игілігін көретін болады.

С.БЕРТАЕВ.