Кітап таңдап, талғап оқи білу, оны түсіну мен түйсіну, алған әсерді өмір қажетіне жарата білу – әрбір адамның білімін, пайымы мен парасатын айқындайды. Әсіресе бүгінгі күні жастарды кітапханаға тарту, кітап оқуға қызығушылықтарын арттыру бәрінен маңызды іс. Біз аялдаған мектеп қабырғасындағы рухани орданың орны бөлек. Мұндағы кітапханашы Тұраш Мыңжасарова мектеп оқушыларының қатысуымен түрлі шаралар өткізіп, олардың рухани әлемге терең бойлауына жұмыс жасап келеді.

Мектеп кітапханасында өтетін мәдени, рухани ша­ралардың барлығы оқушылардың шығар­машы­лы­ғын дамытуға, тарих беттерінен сыр шертетін құнды дүниелерді оқып білуіне бағытталады. Мәсе­лен, оқушылар арасында Жамбыл Жабаевтың 175 жасқа толуына орай «Жүз жасаған Жамбыл» атты мәнерлеп оқудан сайыс өтсе, «Абайды оқы, таңырқа!» тақырыбында Абай өлеңдері, әндерін айту­дан байқау ұйымдастырылған.

Түркі әлемінің көсемі Мұстафа Шоқайдың ту­ға­ны­на 130 жыл толуына орай пікірталас та мек­теп оқу­шы­ларын қамтып, Дулат Исабековтың «Гау­һартас» повесі желі­сінде кітапхана оқырмандары конференция ұйымдастырған.

«Оқушылардың кітап оқуға де­ген құлшынысын арттыру мақсатында бастауыш сынып мұғалімдері мен кітапханашы бірлесе отырып, «Кітапханаға келіп, кітап оқы» кестесін жасадық. Сонымен бірге «Көп оқып, көп білуге ұмтыл» акциясы ұдайы ұйымдастырылып келеді. Тәуелсіздігіміздің 30 жылдығына орай әртүрлі жанрдағы 30 кітаптан кітап көрмесі жасалып, таныс­ты­рылды. Осының ізімен «Тұғыры биік Тәуелсіздік» атты кеш өтіп, баға жетпес құндылық турасында кеңі­нен қозғалды. «Жақсы кітап – жан азығы» атты вир­туалды көрме, ақиық ақын Мұқағали Ма­қа­таев­тың 90 жылдық мерейтойына «Мәңгілік жыр» атты жыр эстафетасы өтті» деген кітапханашы Тұраш Мың­жасарова алдағы жоспарларымен де бөлісті.

Рухани ордада алдағы уақытта Қасым Аман­жо­­лов­­тың 110 жылдығына орай қашықтан та­ныс­ты­ры­лым, ағартушы педагог, жазушы, қоғам қай­рат­кері Ыбырай Алтынсариннің туғанына 180 жыл толуына байланысты «Ұлы даланың ұлы ұстазы» атты кі­тап оқырмандарымен конференция, сондай-ақ «От­ба­сы­лық кітап оқу күні» оқу сағаты, «Туған өлкем неткен көр­кем» кітап көрмесі, «Кітап – байлықтан қым­бат» сая­хат сабақ, тапқыр оқырман сайысы ұйым­дас­ты­рыл­­мақ.

Жалпы мектеп кітапханасында оқушылардың оқу мәдениетінің деңгейін және олардың оқу бел­сен­ді­лі­гінің өсуін арттыру, жас ұрпақ бойында азаматтық, рухани, адамгершілік құндылықтарды қалыптастыру, оқушылар, педагогтар және ата-аналар арасында кітап оқуды насихаттау мақсатында үздіксіз жұмыс­тар жүргізілуде. Әсіресе жастардың кітап оқуға қы­зы­­ғушылығын арттыру, бос уақыттарын тиімді пай­да­лану мақсатына бағытталған шаралардың маңызы зор.