Мемлекетті құлдырататын ең қатерлі факторлардың бірі ол – сыбайлас жемқорлық. Тәртіп қатайып, талап күшейіп, бақылау артқанымен мемлекет қазанынан халық қазынасына заңсыз қол сұғушылардың қатары азаяр емес. Жең ұшынан жалғасқан көз қысты, бармақ басты сыбайластар, соның ішінде мемлекеттік қызмет тізгінін ұстаған жоғары лауазым иелері өздерінің құзіреттерін асыра пайдаланып, пара алу барысында құрыққа ілініп, қылмыстық ісі анықталып, заңға сәйкес жазаға тартылып жатыр. Әйтсе де ол өзгелерге сабақ болмай тұр. Әсіресе, сыбайлас жемқорлыққа байланысты жағдай мемлекеттік қызмет төңірегінде жиі қылаң беретін болды. Бір сөзбен айтқанда, қоғамды жайлап, іштен жегідей жеп келе жатқан бұл қауіпті "кеселдің" алдын алу және болдырмау мақсатында Қазақстан Республикасының "Сыбайлас жемқорлыққа қарсы күрес туралы" Заңының аясында және негізгі қағидалары бойынша сонымен бірге қоғам белсенділері тарапынан да жүйелі жұмыстар жүргізіліп жатыр. Бірақ, нәтиже көңіл көншітпейді. Қайтпек керек?

  

     Осы орайда біздің ойымызға ұлттық тәрбие оралады. Осы сұраққа да сол ұлттық болмысымыздың дәрежесі жауап болатын секілді. Неге? Өйткені, бойында ұлттық қуаты жоқ жандар ұлтына жаны ашымайды, елдің перзенті ретінде қай салада болмасын адал қызмет ете алмайды. Ал, ондай адам өз мұратын ұлт мұратынан биік қояды. Жеке мүдде ұлт мүддесінің алдына шықса, сыбайлас жемқорлыққа жол ашылады. Мемлекет ісіне өз ісіндей қарап, мемлекет мүлкіне жаны ашымайтын кез-келген мемлекеттік қызметші сыбайлас жемқорлыққа жол береді. Ал, мақаламыздың басында айтқанымыздай, сыбайлас жемқорлық өз кезегінде еліміздің әлеуметтік-экономикалық даму үдерісін тежеп, елдің болашағына елеулі қауіп төндіреді. Сондықтан қазірде еліміздегі әрбір Қазақстан азаматының қай қызметте жүрсе де оның қоғамдағы, ұжымдағы ұстанымы тек адалдық, әділдік болуы тиіс. Тіпті жоғарыда айтқанымыздай, әрбір қазақстандық азаматтың бойында болуы тиіс осы адалдық, әділдік секілді адами қасиеттерді біз жас ұрпақтың бойына мектеп қабырғасынан, тіпті отбасынан бастап сіңіруге тиіспіз. Адалдық – төл тәрбиенің бастауы. Болмысы бүтін, ойы таза, адал, әділ адам өз өмірінде түзу жолдан шықпайды. Адалдықты бойына сіңіріп өскен ұрпақ отаншыл, елжанды, мемлекетшіл тұлға болып қалыптасары сөзсіз. Ендеше, сыбайлас жемқорлыққа қарсы іс-қимыл жасағанда осы мәселе ойда тұрғаны абзал.