Қазіргі қоғамды жайлап келе жатқан рухани дерттің бірі – сыбайлас жемқорлық. Бұл дерт адамдардың ашкөздігінен, қанағатсыздығынан, тойымсыздығынан туындайды. Ішкі мәдениеті қалыптаспаған, отаншылдық қасиеттен ада жандар мемлекет қазынасына зиян келтіреді. Бүгінде сыбайлас жемқорлықтың жең ұшынан жалғасқан сипатта орын алуы көбейіп келеді. Бұл тәуелсіз еліміздің келешегі үшін өте қауіпті құбылыс. Сондықтан бұл індеттің алдын алуда барлығымыз жұмыс жасауға тиіспіз. Елбасы Н.Назарбаев сыбайлас жемқорлықпен күресіп оны түбегейлі жою үшін жүйелі жұмыстар жүргізіп, шаралар жасау керектігін құзырлы орындарға жүктеді. Бірақ, жасыратыны жоқ, мемлекеттің қы­руар қаржысын жеке мүддесіне заңсыз жұмсау тыйылар емес.Кеше аудандық қазынашылық бас­қармасында Жалағаш ауданы проку­ро­рының орынбасары Г.Утеевтің және басқарма басшысы мен қызметкерлерінің қатысуымен сыбайлас жемқорлық сипа­тындағы құқық бұзушылықты болдырмау және оның алдын алу мақсатында семинар өтті.
Семинарды ашқан аудандық қазы­нашылық басқармасының басшысы Ө.Жақсылық басқосудың маңызына тоқ­талып, бүгінгі қоғамда жиі көрініс беріп отырған сыбайлас жемқорлықпен күресті күшейту үшін алдымен әр азамат өзін-өзі құқықтық тұрғыдан сауатын жетілдіріп, ішкі мәдениетін қалыптастыруы керектігін және де қоғамды жайлаған сыбайлас жемқорлыққа қарсы жүргізілген амалдар – мемлекеттік қызметтің жүйесін күшейтуге ықпал ететініне тоқталды.
Сондай-ақ семинар барысында Г.Утеев пен Ө.Жақсылық қазіргі қолданыстағы 18.11.2015 жылғы №410-V Заңы «Сыбайлас жемқорлыққа қарсы іс-қимыл туралы» ҚР Заңының сыбайлас жемқорлықтың алдын алу және құқық бұзушылықты болдырмау мақсатындағы жүргізіліп жатқан іс-шаралардың негізгі құралы екендігін атап өтті және осы тақырыптарды талдап, түсіндірді. Г.Утеев құқық қорғау органдары тарапынан сыбайлас жемқорлыққа қарсы күрес жұмыстары жүргізіліп жатқанын, алай­да, елімізде мемлекеттік қызметкерлер арасында сыбайлас жемқорлық бойынша құқық бұзушылықтың көрсеткіші төмен­демей отырғанына қынжылыс біл­дірді. Осыған байланысты Г.Утеев ҚР 18.11.2015 жылғы №410-V Заңы «Сыбайлас жемқорлыққа қарсы іс-қимыл туралы» және 12.01.2007 жылғы №221 «Жеке және заңды тұлғалардың өтініштерін қарау тәртібі туралы» ҚР Заңдарынан туындайтын жалпы жауапкершіліктерге тоқталып, түсіндірме жасады. Осы орайда Г.Утеев сыбайлас жемқорлық біздің мемлекетіміздің дамуына, оның экономикалық өсуіне және тұрақтылығына қауіп төндіріп тұрғанына назар аударды. Семинар тақырыбына байланысты қызметкерлер тарапынан­ қой­ылған бірнеше сауалдарға жауап беріліп, ой-пікірлер ортаға салынды. Аудандық қазынашылық басқармасы бас­шысының орынбасары Ғ.Есжанов қа­зы­нашылық бас­қармасы тарапынан қо­ғамдағы жем­қорлық көріністерін болдырмау мақ­сатында жұмыстар жүргізіліп, бақылау кү­шейтілгендігін жеткізді.
Семинарды қорытындылаған басқарма басшысы жалпы құқықтық сабақ­тардың, семинарлардың жиі өткізілуі қызмет­кер­лердің білімі мен білігінің артуына, еңбек тәртбінің күшейуіне оң әсер ететінін атап өтті.