Қазақстандық жас жұбайлардың ажырасуының негізгі себептері анықталды
«Жастар» ғылыми-зерттеу орталығының сауалнамасынан алынған деректерге сәйкес кедейлік пен тұрғын үйдің жетіспеушілігі ажырасудың басты себебі болып саналады, деп жазады Stan.kz ақпараттық агенттігі Eljastary.kz-ке сілтеме жасап.
Сауалнамаға қатысқандардың 48,6 пайызы ажырасудың себебі қаржы мәселесінен деп көрсетсе, 32,6%-ы тұрғын үйдің жоқтығынан дейді. Ал зерттеуге қатысқан жастардың 22,7% -ы ажырасудың негізгі себебі ерлі-зайыптылардың опасыздығынан деген ойда.
Тұтастай алғанда, жас қазақстандықтар ажырасуды қолдамайды. Олардың ішінде, жастардың 44,9 пайызы арада бала болған жағдайда ажырасуды қолдамайтындарын айтты. Қатысушылардың 31,7 пайызы ажырасуды өте жаман деп санайды.
Сондай-ақ, тағы 17,2 пайызы жас жұбайлар некеде бақытты болмаса, ажырасудан басқа амалы болмайды деп есептейді. Сауалнамаға қатысқандардың көпшілігі ажырасуға дайын емес. Соның ішінде қатысушылардың үштен бірінен астамы қиындықтар туындаған кезде де ажырасуға болмайды деп жауап берді. Олар, отбасылық қиындықтар ерлі-зайыптыларды қорқыта алмайды және ажырасуға себеп болмайды деген пікірде.
Сауалнамаға қатысқандардың 19,5 пайызы неке көңілден шықпаған жағдайда жұбайынан ажырасуға дайын екендігін білдірді.
Stan.kz
Пікір 3