Қызылорда облысы Полиция департа­ментінің Жергілікті полиция қызметі басқар­масы табиғатты қорғау полициясы бөлімінің қызметкерлерімен жүргізілген рейдтік іс-шаралар барысында Жалағаш ауданы Жа­ңа­­дария ауылына қарасты «Қазанбай» учас­­кесінде «Тоуоta Land Cruiser» маркалы автокөлігін тоқтатып, заңсыз аң аулау де­регін анықтады. Тексеру барысында 2 бас қарақұйрық, 33 бас құм қояны, екі дана 12 ка­либрлі 1 ұңғылы мылтық, заттай дәлел­де­мелер алынды, деп хабарлайды полиция де­­партаментінің баспасөз қызметі.

Осыған байланысты күдікті 32-33 жастағы екі азаматқа қатысты ҚР ҚК-нің 337-бабының 4-бөлігімен сотқа дейінгі тергеп-тексеру жұмыстары жүргізіліп, жинақталған материал Жалағаш аудандық сотына жолданған.

Жалағаш аудандық сотының 2018 жылғы 24 қазандағы үкімімен Қазақстан Республикасы ҚК-нің 337-бабының 4-бөлігінің 2, 4 тармақтарымен сотталушылар Н.Ж. мен Е.Х. екеуіне 2 жыл 6 ай мерзімге бас бостандығынан шектеу жазасы тағайындалып, осы мерзімге пробациялық бақылауға алынған. Сонымен бірге, сотталушылардан мемлекет пайдасына 8 млн 729 мың 978 теңге және 3 млн 284 мың 378 теңге залал өндіруге үкім шығарылған.

Сондай-ақ, «Тоуоta Land Cruiser» маркалы автокөлігі, екі дана 12 калибрлі 1 ұңғылы мылтық мемлекет пайдасына тәркіленді.

Айта кетейік, Үкіметтің 2006 жылғы 31 қазандағы №1034 қаулысына сәйкес, қарақұйрық аңы – жануарлардың сирек кездесетін және құрып кету қаупі төнген түрлерінің тізбесіне және Қазақстан Республикасының Қызыл кітабына енгізілген.