Aудандық ГАЗЕТТІҢ САҚТАУШЫСЫ

Біздің басылымға биыл – 85 жыл. Шынымды айтсам, осынша жылдық тарихы бар газеттің ары кетсе соңғы бес-он жылдың көлемінде шыққан нұсқаларын көрдім. Өйткені, мұрағатта болмаса «газеттің бұрынғы шыққан нөмірлері мына жерде сақтаулы тұр» дегенді естімеппін. Сөйтсем, біздің «Жалағаш жаршысының» сақтаушысы бар екен.
Біздің төл басылымды көзінің қарашығындай сақтап келген кісі – бұрын осы газетте редакторлық еткен Зордан Салықбаевтың жұбайы Дина Мирман апамыз екен. Осы жерден сәл кідіріс жасап, Зордан ағайдың қалтқысыз қызметін тағы бір айтпай кету атымызға сын болар. Өлең өлкесінде өзіндік үнімен ерекшеленген ақын 13 жылдай уақыт аудандық газетте редактор болған. Ол кісінің көзін көрмесем де, мінезі жайдары адам екенін жиі естимін. Зордан ағай басшылық жасаған кезеңде осы ұжымда қызмет атқарған «Жалағаш жаршысының» ардагері Серік Бертаев ағайдың өзі мінезінде мін жоқ, жайлы адам еді деп айтып отыратын еді. «Зордан Салықбаев ағаның биязы мінезі мен салиқалы сөзіне, сөйлеу мәдениетіне қызығатынмын. Күнделікті тапсырмасын бермес бұрын алдымен отбасымның амандығын, үйдегі үлкендердің жағдайын сұрап алады. Жылы жүзбен ашық пікірлесіп, айтар ойын астарлап жүрегіңе жеткізеді. Қанша ашуланғанмен артық сөйлеп, айқайға басқан кезін көрген емеспін. Жаныңды ұғып, жағдайыңды түсінетін. Қарамағындағы қызметкерлерді қорғап, қолдап жүретін мұндай басшыға қалайша дән риза болмассың», – дейтін. Жарайды, ағайдың өнегелі өмір жолын бірауыз сөзбен жеткізу емес.
Сақталған газетті көзіммен көру үшін Дина апайға жолықтым. Азын-аулақ әңгімелесіп, газет тігіндісін көріп шықтым. Апайдың архивінде сонау 1965 жылдан бергі шыққан нөмірлер бар екен. Газеттің әр шыққан нөмірін сақтауды әдетке айналдырып, тіпті, бір қиындысын да жерде қалдырмаған жолдасы Зордан ағай екен.
– Жолдасым «Жаңадария» газетінің әр нөмірін көзінің қарашығындай сақтап отыратын. Ол кісі «газет – қоғамның айнасы. Құнды дүние. Ертеңгі күні бұл қағаздар табылмайды. Мұнда қаншама маңдай тер, еңбек бар ғой» дейтін. Сол кезеңдердегі сауыншылар, механиктер, сушы, күрішші дегендердің барлығының өмір жолдары, ел үшін еткен еңбектері басылым бетіне жарияланатын. Бүгінгі ұрпақ үшін көп дүние бар. Жолдасымның редактор болған кездегі ең алғашқы қол қойған нөмірі де сақтаулы. Көзі тірісінде газеттің нөмірлерін жинақтап, тігіндіде тұрса жыртылып, күтімсіз қалады деп, альбом қылып жасатып әкеліп жүрді. Сонау 1965 жылдан бері бұрынғы «Жаңадария» қазіргі «Жалағаш жаршысы» газеті біздің отбасымыздың бір мүшесі болып кетті, – дейді Дина Нұржанқызы.
Газеттің бетіне шыққан сарғайған тігінділердегі дүниелер, басылымның әр жылдардағы шыққан нөмірлері сол кезеңнің тарихы іспеттес. Апайдың қоржынындағы тігінділердің көлемі қазіргіден кішірек. Әр жылда жарық көрген нөмірлері альбом сияқты реттілікпен жасалған. Бірінші бетінің жоғарғы жағында Зордан ағайдың қолымен сол нөмірдің кезекші редакторының аттары жазылған екен. Қазіргідей алғашқы және соңғы беті түрлі-түсті емес, бірыңғай қара түсті. Сосын апайдың архивіндегі сақтаулы тұрған газеттердің барлығы қол машинкамен басылған. Дина апай жолдасының ісін жалғастырып, газет тігіндісін сақтаумен қатар, ағайдың қолжазбаларын, лекцияларын және аудан шежіресі жазылған деректердің түпнұсқаларын сақтап келеді. «Елу жылдан аса біздің отбасымыздың бір мүшесі осы басылым» деген Дина апайдың сөзінен, шаңырағындағы сақтаулы тұрған сарғайған газет тігінділерінен, қазіргі күні де «Жалағаш жаршысын» үзбей оқып отыратындығынан-ақ көненің көзі, асылдың сынығы іспеттес төл басылымымызды ерекше құрметтейтінін, шығармашылық өнерге деген ыстық қыласын көруге болады. Біздің газеттің сақтаушысы Дина апамыздың ендігі мақсаты Зордан ағайдың қолжазбаларын, жинаған дүниелерін кітап қылып шығару.
Ғасырға жуық тарихы бар, бұқараның үніне айналған басылым – ауданның жалғыз айнасы. Тұщымды мақалалармен, түрлі айдарлармен жарық көріп жүрген «Жалағаш жаршысының» бүгінгі келбеті жарқын. Түрлі айдарлармен тұрғындар көкейіндегі түйткілді мәселелерді қозғап жүрген қоғамдық-саяси газет әлі де ақпарат айдынында кең тыныстап, көзі қарақты оқырманның сүйікті басылымына айнала берері сөзсіз.
Нұржамила АЛМАСҚЫЗЫ,
М.АХМЕТОВ (сурет).