Жалағашта кеңес дәуірінен қалған ескі бағаналар жаңартылуда. Бұл салаға бөлінген қаражат көлемі де жыл сайын артып келеді. Бүгінге дейін жоғары кернеулі желі тіреулері мен электр бағаналары алмасты.
Тұрғындардың талап-тілегі үде­сінен шығу үшін аудандағы электр торабының қызметкерлері күні-түні кірпік қақпай жұмыс істеуде. Соның нәтижесінде желіні жаңарту жұмысы қарқынды жүзеге асып келеді. Бүгінде ауданда тозығы жеткен трансформаторлар жоқ емес. Олар­дың дені өткен ғасырдың 70-80 жылдары салынған. Көне электр желілерін жаңарту жұмыстарына биыл тиісті қаржы бөлініп, бұл жұмыстар одан әрі қарқын алды.
Ал облыстық бюджеттен қарал­ған қаржыға Аққыр, Жаңа­дария, Мәдениет және Жаңаталап елді мекендерінің электр жүйелерін қайта жаңғырту жұмыстары баста­лып кетті. Келесі жылы Аққұм және Бұқарбай елді мекендерінің де бағаналары жаңартылмақ.
Аудандық электр торабының басшысы Ә.Райымбектің қоғам­дық кеңес алдында жасаған баянда­масын­дағы мәліметке сүйенсек, ат­қа­рылған жұмыстың нәтижесінде электр желілерінің жағдайы дұрыс­талып келеді.