Жас ұрпақты отансүйгіштікке, елжандылыққа тәрбиелеу тәуелсіз мемлекетіміздің басты мақсаты және бұл тек мемлекеттің ғана мойнындағы міндет емес, әрбір қазақстандықтың перзенттік парызы, азаматтық борышы. Отанын шын сүйе алмаған, өз елінің қадір-қасиетіне терең бойлай алмаған адам өз елінің нағыз патриоты болып қалыптаспайды. Ондай жасөспірім еліне де шынайы қызмет ете алмасы анық. Сондықтан бүгінгі жастарды патриоттық рухта тәрбиелеу ісі өте маңызды.

Елдік нышанымыз – Ту, Елтаңба және Әнұран мемлекетіміздің рухын ас­қақ­татып тұр. Осы мемлекеттік рә­міздеріміз арқылы бізді бүгінде әлем елдері таныды, білді. Көк Туымыз талай мәрте еліміздің жеңісін паш етіп көкке көтерілгенде көзімізден моншақтап қуаныштың жасы төгілді. Әнұранымыз тәуелсіз елдің даңқын асқақтатып аспан астын кернеп шыр­қалғанда кеудемізге рух қуатын құйды. Әлем жұрты Елтаңбамыздан өткеніміз бен бүгінімізді көріп, бізді ұлы халық ретінде мойындады. Сондықтан біз осы мемлекеттік рәміздеріміздің қадір-қасиетін, киесін жас ұрпақтың бойына сіңіруден жалықпауға тиіспіз.

«Nur Otan» партиясының қол­дауы­мен мемлекеттік рәміздерді құр­меттеуге арналған патриоттық сипат­тағы акция сонау Алатаудың баурайындағы “Медеу” мұз ай­дынынан бастау алған еді. Атал­ған шара ауданымызда жал­ғасын тапты. Жалағаш индустриалды аграр­­­лық колледжінде қазақстандық жас­тар арасында патриоттық се­зімді нығайтып, мемлекеттік туды наси­­хат­­тау және жас­тар­ды патриотизмге тәрбиелеу мақ­сатында "Менің Туым, менің Отаным" атты акция өтті. Шараға «Nur Otan» пар­тиясы аудандық филиалы төра­ғасының бірінші орынбасары Қаншагүл Мұстафаева, аудандық мәсли­хат депутаты, аудандық жас­тар ре­сур­сы орталығының дирек­торы Ерхан Бақбергенұлы, «Jas Otan» жастар қанатының Жалағаш аудан­дық бөлімшесінің басшысы Нарбота Серәлі, колледж студенттері, оқу­шы­лар және мұғалімдер қатысты.

Салтанатты шараны ашқан Қаншагүл Мұстафаева акцияның негізгі мақсатына тоқталып, мемлекеттік рә­міз­­дердің құндылығын атап өтті.

– Отанның қадір-қасиетін сезіну үшін бір сәт Мемлекеттік Туға қарап тұрып Әнұранды шырқасаң, жүрегіңнен елге, жерге деген сүйіспеншілік оянып, қаның тулайды, – деп жастарға патри­от­тық серпін берді. Сонымен бірге Ерхан Бақбергенұлы Мемлекеттік рә­міздерді құрметтеу Отанға деген сүйіспеншіліктен басталатынын, өйт­кені елдігімізді айшықтап тұрған рәміздерде біздің ғасырлар бойғы тарихымыз, өмір-салтымыз, ар, намысымыз, рухымыз тұнып тұрғанын жеткізді. Өз кезегінде белсенді жас Нарбота Серәлі отанды сүюдің үлгісі айшықталған жалынды жырын оқып, жастарды еліміздің келешегі үшін атқарылар игі бастамаларды бірлесіп атқаруға шақырды. Колледж басшысы Ғани Серікбаев студенттер мен қонақтарға республика аумағында өтіп жатқан акция жайында айтып, аталған шараның қазақстандық патриотизмді қалыптастыруға ықпалын тигізетінін жеткізді.

Иә, расында отандық патриотизм – елдікті, мемлекеттілікті саналы түрде сезіну, туып-өскен жерін қадірлеу, ана тілін жетік меңгеріп, оған құрметпен қарау. Отанның мүддесін ойлау, туған жеріне деген адал, азаматтық сезіммен елің­нің гүлденуі үшін еңбек ету.