Жалағаш кентін екіге бөліп тұрған теміржол арқылы жаяу жүргіншілерге арналған қауіпсіз өткелдің қажеттігі тұрғындардың көкейінде көптен жүр­ген мәселе еді. Бұл мәселе аудан әкімінің есеп беру жиналысында да айтылды. Тұрғындардың талап-тілегін ескере отырып, аталған мәселе туралы 2018 жылы «ҚТЖ» ҰК» АҚ «Магистралдық желілі дирекциясы» филиалының директоры Ж.Изгуловқа хат жолданды. Осы хатқа сәйкес Қызылорда магистральды желі бөлімшесінің №277 бұйрығымен ар­найы комиссия құрылып, комиссия 2018 жылы теміржол арқылы жаяу жүргіншілерге арналған аспалы көпір салынатын жер учаскесін таңдау, зерделеу, зерттеу жұмыстарын жүр­гізді.

Зерделеу жұмыстары барысында аспалы көпір салынатын участок Жалағаш станциясының 2743 км пк 8+18 учаскесі (Өмірбай шешен көшесінің теміржолмен қиылысқан учаскесі) болып белгіленді. Алайда кент тұрғындарынан теміржол арқылы жаяу жүргіншілерге арналған аспалы көпір үшін алдын-ала белгіленген жер учаскесі орнын, Өмірбай шешен көшесінен теміржол вокзалы мен тесік көпір өткелі маңына өзгерту жөнінде ұсыныс-пікір түсті. Осыған орай 2018 жылы Қызылорда магистралды желі бөлімшесінің ди­ректоры И.Басығараевқа екінші рет хат жолданып, комиссия құрамы қайта шақырылды. Осы жылы ко­мис­сиямен жан-жақты зерттеу, тал­дау жұмыстары жүргізілді. Кент тұр­ғындары көпір салуға ұсыныс беріп отырған жер (теміржол вок­залы мен тесік көпір маңы) 2744 шақырымның 8-ші жүздігі. Ол жерде №5,7,9,11 теміржол бұрмалары, яғни темір жол бұрмаларын ауыстыру кезінде теміржол крандарына кедергі келтіретіндіктен және жақын арада 50 метр қашықтықта су өтуге арналған көз (тесік көпір) орналасқандықтан, СНиП РК 3.03-2001 ережелеріне сәйкес ол жерге жаяу жүргінші өтетін аспалы көпір салуға болмайтындығы туралы Қызылорда жол дистанциясының бастығы Д.Әбдиевтің 2018 жылғы №120 санды хатымен хабарланып, аспалы көпір салынатын орын зерт­теліп, комиссияның шешімімен жер учаскесі белгіленді. (Өмірбай шешен көшесінің теміржолмен қиы­лыс­қан учаскесі).

Сонымен қатар осы мәселені түп­кілікті шешу мақсатында, қазіргі тесік көпірді жаяу жүргіншілер өтетін өткел ретінде қалдырып, ал авто­көлік­тер үшін Жалағаш кентінің шы­ғыс жақ бетінен теміржол үстінен көліктер өткелін (ескі переезд орны) салу қажеттілігі жөнінде 2018 жылы «ҚТЖ»ҰК» АҚ «Магистральдық желі­лі дирекциясы» АҚ филиалының директоры Ж.Изгуловқа, 2019 жылы «ҚТЖ» ҰҚ» магистралдық желілер дирекциясы филиалының инфра­құрылым бойынша басқарушы дирек­торы Б.Орынбасаровқа хат жол­дан­ды.

Бірақ «ҚТЖ» ҰК» АҚ-ның «Магис­­­тральдық желі дирекциясы» фи­лиалының директоры Т.Кенже­беков­тің 2018 жылғы, «ҚТЖ» ҰК» АҚ-ның «Магистральдық желі дирек­циясы» филиалының Инфра­құрылым жө­ніндегі басқа­рушы дирек­тор-филиал директоры Б.Орын­баса­ровтың 2019 жылғы хаттарында көрсетілгендей, Қараиірім-Жалағаш аралығының 2741 шақырымындағы 6-пикетінде күзе­тілетін теміржол өт­пе­сі орна­лас­қандықтан, 2743 шақырым темір жол өтпесін ашу мақсатқа сай келмейтін болды. Сондықтан Жалағаш кенті тұрғындарының талап-тілектерін ескере отырып, теміржолдың екі бетін байланыстырып, тұрғындардың қауіпсіз қатынасын қамтамасыз ету мақсатында биыл Жалағаш кен­тіндегі теміржол үстімен өтетін жаяу жүргіншілерге арналған аспалы көпір құрылысының жоба-сметалық құжаттарын дайындауға аудандық бюджеттен 4 млн теңге қаржы қаралды. Қазіргі таңда аудандық тұр­ғын үй-коммуналдық шаруашылық, жолаушылар көлігі және автомобиль жолдары бөлімі арқылы мемлекеттік сатып алу рәсімдері жүргізіліп, аспалы көпірдің жобасын дайындайтын жоба­лаушы мекеме анықталды. Әрі қарай көпір құрылысының жалпы құны есептеліп, қажетті қаржыға ұсыныс бе­ріледі. Ал оған дейін аудан тұр­ғын­дарының теміржолдың екі бетіне қауіпсіз қатынасын қамтамасыз ету үшін теміржолдың астынан өте­тін ав­то­мобиль жолының бір жақ бөлігін темір қоршаумен бөліп, жаяу жүр­гін­шілер жолы жасалып жатыр.