Өркениетті елдер тұрғындарына қандай да бір демалатын орын ұсына алуымен ерекшеленеді және сол елдің халқы үшін оның көлемі, сән-сәулеті маңызды емес. Бастысы адамдардың бір сәт демалып, айналасына көз жіберіп, өмірден ой түюіне ықпал етсе болғаны. Мәселен, қоғамдық орындарға, саябаққа немесе көше бойына бір ғана жайлы орындық орнатудың өзі сол қоғамда өмір сүріп жатқан адамдардың өмірге, айналасына деген көзқарасын өзгертіп, басқаша түсінік қалыптастыруы әбден мүмкін. Сол өркениетті қалаларда арнайы демалыс орындарын айтпағанда, әр аулада балаларға арналған ойын алаңдары мен ересектерге арналған жаттығу алаңқайлары бар. Ата-анасымен бірге таза ауа жұтып, серуендеуге шыққан әрбір балақай “Қайда барамын?” деп аңтарылып тұрмайды, әлгі өздеріне арнап жасалған ойын алаңына барып, өзі қатарлы балаларға қосылады және ол жерде баланың қауіпсіздігі барынша қамтамасыз етілген. Баланың өміріне, денсаулығына зиянын тигізетін артық-ауыс темір-терсек жоқ. Балалар еш алаңсыз ойнайды. Бала сол алаңқайда ойнап қана қоймайды. Біріншіден, балалармен танысады, қоғамдық қарым-қатынастың алғы шарттарын үйренеді, бір-екі сағат болса да тынымсыз қимыл-қозғалыс арқылы физикалық тұрғыда шынығады. Ал ол кезде балалардың ата-аналары, яғни ересектер де өздеріне арналған алаңқайда физикалық жаттығулар жасап жатады. Өркениетті ел салауатты өмір салтына осылай мән береді.

Мұндай жағдай қазір біздің елімізде де жасала бастады. Үлкен қалаларды айтпағанда, аудан мен ауылдық елді мекендерде де ойын алаңдары бар. Таяуда ғана аудан орталығынан балаларға арнап жаңа ойын алаңы салынып, пайдалануға берілді. Айналасы қауіпсіздік үшін сәнді темір қоршаумен қоршалған бұл маңай қазір күні бойы адамнан босамайды. Заманауи үлгіде сапалы материалдардан жасалған «әткеншек», «айналмақ», «сырғанақ», «таразы», «үйшікке» кезек-кезек мініп, мәз-мәйрам болған балалардың қуанышында шек жоқ.

Айта кетейік, балаларға қуаныш сыйлаған бұл ерекше ойын алаңын өз қаржысына салған «Nomad Solar» ЖШС.

– «Бар жақсылық – балаларға». Бұл қай қоғамның да басты ұраны, ұстанымы болуы тиіс. Біз де осындай ұстанымның негізінде осы ойын алаңын салып, бүлдіршіндерді қуантқымыз келді. Өйткені еліміздің келешегі – бүгінгі ойын балалары. Сондықтан да біз көп жағдайда олардың талап-тілегімен санасып, сұранысын қанағаттандыруға тиіспіз. Балалар ойнайтын, тіпті ересек адамдардың өзі демалатын алаңдарды көптеп салуымыз керек. Бұл құрылысқа 16 миллион 776 мың 520 теңге қаржы жұмсалды. Ойын алаңына орналастырылған жаңа жабдықтардың барлығы жоғары сапалы және біздің тара­пымыздан балалардың жан-жақты қауіп­сіздігі де ескерілді. Алдағы уақытта да жергілікті әкімшілікпен бірлесіп жүзеге асыратын осындай жобаларымыз бар, – дейді «Nomad Solar» ЖШС-ның менеджері Марат Әмірсейітов.

Расында қазірде аталған алаңда асыр салып ойнаған бала көп және олардың бал-бұл жанған жүздерінен шаттықтың лебі еседі. Ата-ана үшін баласының қуанышты жүзін көруден, олардың шаттанған әрбір сәтіне куә болудан асқан қандай бақыт бар?!

– Біз ата-ана ретінде осындай ойын алаңының салынғанына қуаныштымыз. Өйткені қазіргі балаларда қимыл-қоз­ғалыс жоқ, дене белсенділігі өте төмен. Олар таңнан кешке дейінгі уақытын теледидардың алдында немесе план­шетті құшақтап отырып өткізеді. Сон­дықтан біз балаларымыздың денсау­лығына қатты алаңдаушы едік. Енді міне, осы ойын алаңы ашылғалы екі баламды кешке қарай осы жерге әкеліп ойнатамын. Қызығушылығы зор, қайтқысы келмейді. Екі сағат болса да баламыз планшеттен босап, миы, көзі тынығып, күні бойы құрысқан тұла бойы жазылып, ойы сергіп қалады. Ауданымыздағы осындай игілікті істердің жасалуына себепші болып жатқан аудан басшысына алғысымыз шексіз, – дейді Жанар Мәлікқызы.