АУДАН ӘКІМІ АСЫЛБЕК ШАМЕНОВТЫҢ 28 маусым – Бұқаралық ақпарат құралдары қызметкерлерінің мерекесі КҮНІНЕ ОРАЙ ҚҰТТЫҚТАУЫ
Құрметті журналистер, бұқаралық ақпарат құралдарының қызметкерлері!Сіздерді 28 маусым – Бұқаралық ақпарат құралдары қызметкерлерінің мерекесімен құттықтаймын!
Қалың бұқара өздеріңізді еліміздегі төртінші билік санап, тегеурінді күш ретінде таниды. Бұл журналистердің билік пен халықты байланыстыратын мызғымас алтын көпірдің қызметін атқаратынын айғақтайды.
Ой қуалап, сөз ұйқастыру, одан шымыр дүние жазып шығару екінің біріне бұйырмаған асыл қасиет.
Егемен еліміздің және туған өлкеміздің дамуын, халық ішіндегі өзекті мәселелерді талдап, биліктің назарына ұсынуда, мемлекеттік бағдарламалар мен реформалардың мәнін жан-жақты ақпараттандырудағы еселі еңбектеріңіз үшін Сіздерге алғыс білдіремін.
Қазіргі таңда ауданның медиа кеңістігінде 1 бұқаралық ақпарат құралы, атап айтқанда аудандық «Жалағаш жаршысы» газеті жұмыс жасап келеді.
Аудандық басылым – аймақта өзіндік өрелі тарихы бар, бағыт-бағдары айқын, аудан жұртшылығы сүйсіне оқитын, тамыры тереңнен бастау алатын беделді басылымдардың бірі.
Аудандық газет қай уақытта да елдi бiрлiкке шақырып, қиын шақтарда елдiң патриоттық рухын көтерiп, халық шаруашылығын дамытуға, еңбек қаһармандарын халық арасында насихаттауға қызмет етіп келеді.
Журналистика - халықтың көзі, құлағы, тілі, журналистер қауымын «төртінші билік» деп те атаймыз.
Мерейлі мерекеде еңбектеріңізге шығармашылық шабыт, қаламдарыңызға қуат, отбасыларыңызға бақ-береке, ырыс-ынтымақ тілеймін!
Тәуелсіздігіміз тұғырлы, бірлігіміз баянды, еліміз аман болсын!
Құрметпен, Жалағаш ауданының әкімі Асылбек Шаменов
