28 маусым – Байланыс және бұқара­лық ақпарат құралдары қызмет­керлері күні аудан әкімі Қайратбек Сәрсенбаев аудан әкімдігінің мәжіліс залында аудандық «Жалағаш жаршысы» газеті ұжымы мен ардагерлерді, қаламгер қауымын қабылдады.
Баспасөз саласы қызметкерлерін төл мерекелерімен құттықтаған өңір басшысы қазіргі таңда ақпараттық-коммуникациялық технологиялар әлемдік дамудың алғы шартына айналып отырғанын айтты. Осы орайда қоғамның жаңарып, дамуына ықпал ететін бірден-бір күш журналистер қауымының қызметіне тоқталып өтті. Сексен төрт жыл тарихы бар аудандық басылымның қазіргі кезде бет-бейнесі жанарып, мазмұны мен сапасы арта түскенін айтты. Сондай-ақ, аудандағы жарқын істерді жарқырата жазумен бірге өзекті мәселелерді дер кезінде көтеріп, оның оң шешімін табуына ықпал етіп жүрген журналистердің жұмысына оң баға берді.
Қабылдау кезінде аудан ардагерлер ке­ңесінің төрағасы С.Алиев, аудандық мәслихат депутаты К.Сүлейменов, Қазақстан Журналистер одағының мүше­лері Р.Кәрімов, Ж.Адамбаев, Р.Көшекбаева, С.Бертаев, ардагер Қ.Ерғалиевалар мере­келік ізгі тілектерін жеткізіп, газет жұмысына байланысты ойларын ортаға салды. Газет редакторы Н.Сауяев аудандық басы­лым­ның қазіргі тіршілік-тынысы, алдағы жос­парлары жайлы баяндады.
Қабылдау соңында аудан әкімі Қ.Сәрсенбаев бір топ бұқаралық ақпарат құралдары қызметкерлеріне аудан әкімінің «Құттықтау» хаты мен сыйлықтарын табыс етті. Марапат иелерінің қатарында «Жалағаш жаршысы» газетінің қызмет­керлері С.Бертаев, Н.Қазбеков, М.Ахметов, А.Ізтелеуовалар бар. Сонымен бірге мереке қарсаңында облыс орталығында өткен салтанатты шарада газеттің жауапты хатшысы Қ.Ахетов Қазақстан Журналистер одағының «Құрмет грамотасымен» марапатталды.