» » Қарулы Күштерде қауырт тексеру басталды

Қарулы Күштерде қауырт тексеру басталды

Фото: gov.kzБірқатар өңірлік қолбасшылықтардың әскери бөлімдері, десанттық-шабуылдау әскерлері, Әскери-теңіз күштері, Әскери-әуе күштері жауынгерлік әзірлікті тексеру мақсатында дабыл қақты. Әскерлерді елдің өзге аймақтарына жіберуге бұйрық берілді, деп жазады Egemen.kz.

Әскери қызметшілер әскери техникамен бірге теміржол эшелондарымен, әскери-көлік авиациясымен алыс жерлерге жіберіледі. Бұдан басқа, оқу-жаттығу мақсатында жеке құрамды тасымалдауға азаматтық авиакомпаниядан ұшақ тарту жоспарланған.




Жергілікті әскери басқару органдарына кейбір запастағы әскери міндеттілерді шақыру туралы нұсқау берілді. Бірнеше азаматқа әскерге шақыру қағазы табысталды. Осылайша әскери-оқытылған резервті жұмылдыру мүмкіндігі тексеріледі.

«Белгіленген ауданға келген әскерлер жауынгерлік оқу-жаттығу тапсырмаларын орындайды», деп жазады Қорғаныс министрлігінің баспасөз қызметі.

Ведомствоның хабарлауынша, аталған шаралар ел Президенті Қасым-Жомарт Тоқаевтың 2021 жылғы 1 қыркүйектегі Қазақстан халқына Жолдауында, сондай-ақ 2020 жылғы қарашада Қорғаныс министрлігінің алқасында белгіленген тапсырмаларын іске асыру аясында іске асып отыр.


03 қыркүйек 2021 ж. 465 0